ముఖ్యమంత్రి రాజీనామాకు ఎర్రన్నాయుడు డిమాండ్

By Srinivas

Published: Monday, August 22, 2011, 12:21 [IST]

శ్రీకాకుళం: వైయస్సార్సీ పార్టీ అధినేత, కడప పార్లమెంటు సభ్యుడు వైయస్ జగన్మోహన్ రెడ్డి అక్రమాస్తులపై సిబిఐ చేస్తున్న దాడుల నుండి ప్రజల దృష్టి మరల్చడానికే జగన్ వర్గం శాసనసభ్యులు రాజీనామాల డ్రామా ఆడుతున్నారని తెలుగుదేశం పార్టీ సీనియర్ నాయకుడు ఎర్రన్నాయుడు శ్రీకాకుళంలో అన్నారు. కాంగ్రెసు ఎమ్మెల్యేల రాజీనామాలకు నైతిక బాధ్యత వహిస్తూ ముఖ్యమంత్రి కిరణ్ కుమార్ రెడ్డి వెంటనే రాజీనామా చేయాలని ఆయన డిమాండ్ చేశారు. దివంగత ముఖ్యమంత్రి వైయస్ రాజశేఖర రెడ్డి హయాంలో జరిగిన అవినీతిలో కేంద్రానికి వాటా ఉందని ఆయన ఆరోపించారు.

బోఫోర్సు అక్రమాలపై వైయస్ కుటుంబం వారికి మాట్లాడే అర్హత లేదన్నారు. బోఫోర్సు వ్యవహారం తీరుపై తెలుగుదేశం పార్టీ ఎంపీలు రాజీనామాలు చేసినప్పటికీ వైయస్సార్ రాజీనామా చేయలేదని విమర్శించారు. జగన్ వర్గం శాసనసభ్యుల రాజీనామాల వల్ల ప్రభుత్వానికి ఎలాంటి ఢోకా లేదని రాజ్యసభ సభ్యుడు మైసూరా రెడ్డి ఓ టీవీ ఛానల్ కార్యక్రమంలో అన్నారు. ప్రభుత్వం పడి పోవాలంటే 70 మంది శాసనసభ్యులు రాజీనామా చేయాలని ఆయన అన్నారు. అలా అయితేనే ప్రభుత్వం పడిపోతుందన్నారు.

Published On August 22, 2011