అందుకే జగన్ ఎమ్మెల్యేలు రోడ్డెక్కారు: చంద్రబాబు

By Srinivas

Published: Tuesday, August 23, 2011, 14:36 [IST]

విశాఖపట్నం: అవినీతిని కప్పి పుచ్చుకునేందుకే వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులు రాజీనామాలు చేసి రోడ్డెక్కారని తెలుగుదేశం పార్టీ అధినేత నారా చంద్రబాబు నాయుడు మంగళవారం విమర్శించారు. అవినీతికి వ్యతిరేకంగా సంఘ సంస్కర్త అన్నాహజారే నిరాహార దీక్షకు మద్దతుగా చంద్రబాబు విశాఖపట్నంలో ఆందోళన చేపట్టారు. ఈ సందర్భంగా ఆయన మాట్లాడారు. అవినీతిపరులు రోడ్డెక్కి ఉపన్యాసాలు ఇవ్వడం విచారకరమన్నారు.

అవినీతి దేశానికి క్యాన్సర్ వంటిదని, తీవ్రవాదం కంటే ప్రమాదకరమైనదని అన్నారు. కాంగ్రెసు పార్టీ దేశాన్ని భ్రష్టు పట్టిస్తోందన్నారు. అవినీతిరహిత సమాజం కోసం ఇంటికొక్కరు ఉద్యమం చేయాలని పిలుపునిచ్చారు. అవినీతి నిర్మూలనకు తెలుగుదేశం పార్టీ రాజీలేని పోరాటం చేస్తోందన్నారు. అవినీతిపై దేశ ప్రజానీకం రోడ్డు పైకి ఎక్కి పోరాడాల్సిన పరిస్థితి తయారయిందన్నారు. రాష్ట్రంలో దౌర్భాగ్య రాజకీయాలు నడుస్తున్నాయన్నారు. కాంగ్రెసు ప్రభుత్వం రాష్ట్రాన్ని కుక్కలు చింపిన విస్తరి చేసిందన్నారు.

Published On August 23, 2011