నన్ను, నా తల్లిని ఎదుర్కోలేకే నీచ రాజకీయాలు: జగన్

By Pratap

Published: Tuesday, August 23, 2011, 8:47 [IST]

విజయవాడ: తనను, తన తల్లిని ఎదుర్కొనే సత్తాలేకనే కాంగ్రెస్ పెద్దలు తెలుగుదేశం పార్టీ అధినేత చంద్రబాబుతో కుమ్మక్కై నీచరాజకీయాలకు పాల్పడుతున్నారని వైయస్సార్ కాంగ్రెస్ అధ్యక్షుడు వైయస్ జగన్ ధ్వజమెత్తారు. వైఎస్ఆర్ మరణాన్ని తట్టుకోలేక ఎంతో మంది మృతి చెందారని, వారి కుటుంబాలను పరామర్శిస్తానని ఇచ్చిన మాటను తప్పనని ఆయన అన్నారు. అందుకోసం ఎంతదాకానైనా పోరాడతానని స్పష్టం చేశారు. కృష్ణా జిల్లాలో చేస్తున్న ఓదార్పు యాత్రలో భాగంగా సోమవారం మైలవరం, జి.కొండూరు మండలాల్లో పర్యటించారు.

ఓదార్పు యాత్ర సభల్లో ఆయన సోమవారం ప్రసంగించారు. వైఎస్ మరణానంతరం రాష్ట్ర పరిస్థితి చూస్తోంటే గుండె తరుక్కుపోతుందని అన్నారు. రైతు సమస్యలను, ప్రజల సంక్షేమాన్ని పట్టించుకునే వారు కరువయ్యారని అన్నారు. తనపై కావాలని ఎన్నో కుట్రలు చేస్తున్నారని ఆరోపించారు. తనను ఓదార్చడానికి తన తండ్రి వైఎస్ఆర్ జీవించి లేకున్నా ప్రతి పేదవాడి గుండెలో వైఎస్‌ను చూస్తూ బాధను దిగమింగుతున్నానని చెప్పారు. ఎవరు ఎన్ని కుటిల రాజకీయాలు చేసినా తనకు దేవుడు, ప్రజల అండ ఉందన్నారు.

Published On August 23, 2011