సిబిఐకి జగన్ కంపెనీల వివరాలిస్తాం: ప్రణబ్ ముఖర్జీ

By Srinivas

Published: Tuesday, May 29, 2012, 8:10 [IST]

న్యూఢిల్లీ: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి కంపెనీలలో పెట్టుబడులు పెట్టిన బోగస్ కంపెనీల వివరాలను సెంట్రల్ బ్యూరో ఆఫ్ ఇన్వెస్టిగేషన్(సిబిఐ) అడిగినప్పుడు ఇస్తామని కేంద్ర ఆర్థిక శాఖ మంత్రి ప్రణబ్ ముఖర్జీ మంగళవారం రాజ్యసభలో తెలిపారు. ఇప్పటి వరకు జగన్ కంపెనీలలో పెట్టుబడులు పెట్టిన కంపెనీల వివరాలు కావాలని తమను సిబిఐ అడగలేదన్నారు. వారు అడిగితే జగతి పబ్లికేషన్స్, ఇందిరా టెలివిజన్ తదితర జగన్ కంపెనీలలో పెట్టుబడులు పెట్టిన వారి వివరాలు ఇవ్వడానికి సిద్ధంగా ఉన్నామని చెప్పారు. ఇప్పటి వరకు వాటిపై ఇంకా దృష్టి సారించలేదన్నారు.

రాజ్యసభ సభ్యుడు హన్మంతరావు జగన్ కేసు విషయంలో సభలో ఓ అనుబంధ ప్రశ్న వేశారు. హన్మంతరావు మొదటి నుండి జగన్ ఆస్తులపై విమర్శలు గుప్పిస్తూనే ఉన్నారు. కాగా మరోవైపు సిబిఐ జగన్ ఆస్తులు, ఎమ్మార్ కేసులలో సోదాలు కొనసాగిస్తోంది. మంగళవారం కూడా హైదరాబాదులోని పలువురి ఇళ్లు, కార్యాలయాలలో సోదాలు నిర్వహించింది.

Published On May 29, 2012