కాంగ్రెసు కోర్ కమిటీలోకి చిరంజీవి, రెండో వారాల్లో

By Pratap

Published: Friday, September 2, 2011, 9:07 [IST]

హైదరాబాద్: రాష్ట్ర స్థాయి పార్టీ కోర్ కమిటీని కాంగ్రెసు అధిష్టానం రెండు వారాల్లో వేయనున్నట్లు వార్తలు వస్తున్నాయి. తన ప్రజారాజ్యం పార్టీని కాంగ్రెసులో విలీనం చేసిన చిరంజీవికి ఈ కోర్ కమిటీలో స్థానం దక్కుతుంది. పిసిసి అధ్యక్షుడు బొత్స సత్యనారాయణ, ముఖ్యమంత్రి కిరణ్ కుమార్ రెడ్డి, ఉప ముఖ్యమంత్రి దామోదర రాజనర్సింహ, పార్టీ రాష్ట్ర వ్యవహారాల ఇంచార్జీ గులాం నబీ ఆజాద్ ఈ కమిటీలో సభ్యులుగా ఉంటారు. పార్టీపరంగా కీలకమైన అంశాలపై ఈ కమిటీలో చర్చించి నిర్ణయం తీసుకుంటారు.

గతంలో ఒక్కసారి అటువంటి కోర్ కమిటీని ఏర్పాటు చేశారు. అప్పటి పార్టీ రాష్ట్ర వ్యవహారాల ఇంచార్జీ వీరప్ప మొయిలీ చైర్మన్‌గా, పిసిసి అధ్యక్షుడు డి. శ్రీనివాస్ కన్వీనర్‌గా, అప్పటి ముఖ్యమంత్రి కె. రోశయ్య, పార్లమెంటు సభ్యులు వైయస్ జగన్, కావూరి సాంబశివరావు, కెవిపి రామచందర్ రావు సభ్యులుగా ఆ కమిటీ ఏర్పాటైంది. అయితే, ఆ కమిటీ ఒక్కసారి కూడా సమావేశం కాలేదు.

Published On September 2, 2011