చంద్రబాబు ఆస్తులపై విరుచుకుపడిన లక్ష్మీపార్వతి

By Pratap

Published: Friday, September 2, 2011, 15:21 [IST]

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు వెల్లడించిన తన కుటుంబ ఆస్తుల వ్యవహారంపై స్వర్గీయ ఎన్టీ రామారావు సతీమణి, ఎన్టీఆర్ తెలుగుదేశం పార్టీ అధ్యక్షురాలు లక్ష్మీపార్వతి విరుచుకుపడ్డారు. చంద్రబాబు ఆస్తుల విలువ కేవలం 39 కోట్ల రూపాయలట అని ఆమె వ్యంగ్యంగా అన్నారు. ఆ మొత్తం పెట్టుబడులు మాత్రమేనని, వాటి విలువ చెప్పడట అని ఆమె శుక్రవారం మీడియా ప్రతినిధుల సమావేశంలో అన్నారు. చంద్రబాబు కొన్ని ఆస్తుల వివరాలు వెల్లడించలేదని ఆమె అన్నారు. తమిళనాడు, కర్ణాటక రాష్ట్రాల్లో ఉన్న ఆస్తుల గురించి, బినామీ ఆస్తులను చంద్రబాబు వెల్లడించలేదని ఆమె చెప్పారు. విదేశాల్లో ఉన్న నల్లడబ్బు సంగతేమిటని ఆమె అడిగారు. మాదాపూర్, గచ్చిబౌలి ప్రాంతాల్లో బినామీల పేరు మీద 30 ఎకరాల భూమి ఉందని ఆమె చెప్పారు.

లక్షా 45 కోట్ల ఆదాయం ఉన్న చంద్రబాబు ఇన్ని కోట్ల ఆస్తిపరుడు ఎలా అయ్యాడో చెప్పాలని ఆమె డిమాండ్ చేశారు. కాంట్రాక్టర్ల నుంచి చంద్రబాబు డబ్బులు తీసుకునేవారని ఆమె అన్నారు. నకిలీ నోట్ల కేసులో పట్టుబడిన రామకృష్ణా గౌడ్‌తో చంద్రబాబుకు సంబంధం ఉందని, కృషి బ్యాంక్ చైర్మన్ వెంకటేశ్వర రావును వారం రోజుల పాటు దాచి పెట్టి విదేశాలకు పంపించివేశాడని ఆమె ఆరోపించారు. ఎన్టీ రామారావు చంద్రబాబుకు ఇస్తానన్న ఐదు లక్షల రూపాయల కట్నం కూడా ఇవ్వలేదని, దానికి ఎన్టీ రామారావును చంద్రబాబు ఎల్లవేళలా తిడుతూ ఉండేవాడని, పిసినారి అని నిందిస్తూ ఉండేవాడని, ఎన్టీఆర్ ఏం ఇచ్చారని ఆస్తులు పెరిగాయని ఆమె అన్నారు.

మేనేజ్ చేసుకోగలడు కాబట్టి చంద్రబాబు అబద్ధాలు మాట్లాడుతూనే ఉంటాడని ఆమె వ్యాఖ్యానించారు. హైదరాబాదు పంజగుట్టలో ఉన్న హెరిటేజ్ కార్యాలయం భూమి ఎవరిదని ఆమె అడిగారు. చంద్రబాబు కుమారుడు లోకేష్ ఏం చేస్తున్నాడని కోట్ల రూపాయల ఆస్తులు కూడబెట్టారని ఆమె అడిగారు. చంద్రబాబు నటనలో పండిపోయారని, చంద్రబాబుకు ఒకేసారి 20 అవార్డులు నటనకు గాను ఇవ్వవచ్చునని లక్ష్మిపార్వతి అన్నారు.

Published On September 2, 2011