వైయస్ జగన్ ఎమ్మెల్యేల సంఖ్య పెరుగుతుంది: మేకపాటి

By Srinivas

Published: Friday, September 2, 2011, 12:39 [IST]

హైదరాబాద్: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వెంట వస్తున్న శాసనసభ్యుల సంఖ్య భవిష్యత్తులో పెరుగుతుందే తప్ప తగ్గదని శ్రీ పొట్టి శ్రీరాములు నెల్లూరు జిల్లా పార్లమెంటు సభ్యుడు మేకపాటి రాజమోహన్ రెడ్డి శుక్రవారం అన్నారు. ఇంకా ఎంతమంది రాజీనామాలు చేస్తారో తాను ఇప్పుడే చెప్పలేనన్నారు. అయితే ఆ సంఖ్య మాత్రం ఖచ్చితంగా పెరుగుతుందన్నారు. దివంగత ముఖ్యమంత్రి వైయస్ రాజశేఖర రెడ్డిని కించపర్చే విధంగా ఎవరు మాట్లాడినా ప్రజలు సహించరన్నారు. ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ఏం మాట్లాడుతున్నారో ప్రజలు గమనిస్తున్నారన్నారు. రాష్ట్రంలో కాంగ్రెసు పార్టీని నామరూపాలు లేకుండా చేయడమే ఆయన లక్ష్యమన్నారు.

జగన్‌ను రాజకీయంగా ఎదుర్కొనలేకే ఆయన ఆస్తులపై సిబిఐ విచారణ జరిపిస్తున్నారని ఆరోపించారు. జగన్ పైన చేస్తున్న కుట్రలు, పన్నాగాలు విజయవంతం కావన్నారు. ప్రభుత్వానికి ఇంకా మూడేళ్ల సమయం ఉన్నందువల్లే చాలామంది ఎమ్మెల్యేలు బయటకు రావడం లేదన్నారు. కాగా వైయస్సార్ వర్ధంతి సందర్భంగా వైయస్సార్సీ పార్టీ కార్యాలయంలో ఉదయం రక్తదాన శిబిరం ప్రారంభించారు. దీనిని మేకపాటి, ఆళ్లగడ్డ ఎమ్మెల్యే శోభా నాగిరెడ్డి, మరో నేత కొణతాల రామకృష్ణ ప్రారంభించారు.

Published On September 2, 2011