రోజా, లక్ష్మీపార్వతిలపై శోభా హైమావతి ఫైర్

By Srinivas

Published: Saturday, September 3, 2011, 15:01 [IST]

విశాఖపట్నం: వైయస్సార్ కాంగ్రెసు పార్టీ నేత రోజా ఏ పార్టీలోకి వెళితే ఆ పార్టీ నాశనం అవుతుందని తెలుగు మహిళా అధ్యక్షురాలు శోభా హైమావతి శుక్రవారం విశాఖపట్నంలో విమర్శించారు. గతంలో దివంగత ముఖ్యమంత్రి వైయస్ రాజశేఖర రెడ్డి ఉన్నప్పుడు కాంగ్రెసులోకి వెళితే ఆయన హెలికాప్టర్ ప్రమాదంలో మృతి చెందారన్నారు. తాజాగా కడప పార్లమెంటు సభ్యుడు వైయస్ జగన్మోహన్ రెడ్డి స్థాపించిన వైయస్సార్సీ పార్టీలోకి వెళ్లగానే జగన్ సిబిఐ ఉచ్చులో చిక్కుకు పోయారన్నారు.

రాజకీయాల్లో పారదర్శంగా ఉండాలనే తమ పార్టీ అధినేత నారా చంద్రబాబు నాయుడు తన కుటుంబ ఆస్తులు ప్రకటించారన్నారు. ఆస్తులు ప్రకటించిన బాబుపై బురద జల్లే ప్రయత్నాలు చేయవద్దన్నారు. చంద్రబాబును విమర్శించే అర్హత రోజాకు గానీ, ఎన్టీఆర్ తెలుగుదేశం పార్టీ అధ్యక్షురాలు లక్ష్మీ పార్వతికి గానీ లేదన్నారు. చంద్రబాబు తన ఆస్తులు ప్రకటించి దేశంలోనే ఆదర్శంగా నిలిచారన్నారు. రోజా సినిమాల్లోలాగా రాజకీయాల్లో రోజుకో వేషం వేయవద్దన్నారు. ధైర్యం ఉండే ఆస్తులపై ఆధారాలు బయట పెట్టాలన్నారు.

Published On September 3, 2011