'గాలి' వజ్ర కిరీటం శ్రీవారికి వద్దంటూ కాంగ్రెసు ఆందోళన

By Srinivas

Published: Tuesday, September 6, 2011, 15:30 [IST]

తిరుపతి: కర్నాటక మాజీ మంత్రి, భారతీయ జనతా పార్టీ సీనియర్ నేత గాలి జనార్ధన్ రెడ్డి తిరుమల శ్రీవారికి ఇచ్చిన వజ్ర కిరీటాన్ని అలంకరించ వద్దని డిమాండ్ చేస్తూ తిరుపతి కాంగ్రెసు పార్టీ కార్యకర్తలు మంగళవారం మధ్యాహ్నం తిరుమల తిరుపతి దేవస్థానం ముందు ఆందోళన చేపట్టారు. మాఫియా సొమ్ముతో చేసిన వజ్ర కిరీటాన్ని కలియుగ దైవం శ్రీ వేంకటేశ్వర స్వామికి అలంకరిస్తే ఊరుకునేది లేదన్నారు. దానిని వెంటనే ప్రభుత్వం స్వాధీనం చేసుకోవాలని డిమాండ్ చేశారు. భారతీయ జనతా పార్టీ అవినీతిని పెంచి పోషిస్తోందని ఆరోపించారు. ఆందోళనకారులు గాలికి, బిజెపికి వ్యతిరేకంగా నినాదాలు చేశారు. మైనింగ్ మాఫియా గాలి కిరీటం వద్దంటూ ప్లకార్డులు ప్రదర్శించారు.

కాగా రెండేళ్ల క్రితం 2009లో గాలి సోదరులు తిరుమల శ్రీ వేంకటేశ్వర స్వామి దర్శనానికి వచ్చినప్పుడు ఓ వజ్ర, స్వర్ణ కిరీటాన్ని శ్రీవారికి బహూకరించారు. దాని విలువ సుమారు 45 కోట్ల రూపాయలు వరకు ఉంటుందని అంచనా. అయితే దానిని పండితులు ఒక్కసారి మాత్రమే అలంకరించారు. ఆ తర్వాత దానిని పక్కకు పెట్టారు. కిరీటం శ్రీవారికి శిరోభారం అవుతుందని భావించి దానిని పక్కకు పెట్టినట్టుగా తెలుస్తోంది. అప్పటికే గాలి సోదరులపై మైనింగ్ ఆరోపణలు వచ్చాయి.

Published On September 6, 2011