పదవులపై టిడిపి, కాంగ్రెసుకు హరీష్ ప్రతి సవాల్

హైదరాబాద్: శాసనసభ్యత్వాలకు రాజీనామా చేసిన తర్వాత మళ్లీ ఎన్నికల్లో పోటీ చేయవద్దన్న తెలుగుదేశం, కాంగ్రెసు పార్టీల సవాల్‌కు తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు బుధవారం స్పందించారు. ప్రత్యేక రాష్ట్రం కోసం తెలంగాణ రాష్ట్రం వచ్చే వరకు మాత్రమే కాదని రాష్ట్రం వచ్చాక కూడా తాము పదవులకు దూరంగా ఉండటానికి సిద్ధంగా ఉన్నామన్నారు. దమ్ముంటే ఇప్పుడు టిడిపి, కాంగ్రెసు ప్రజా ప్రతినిధులు రాజీనామా చేసి ఆమోదింపజేసుకోవాలని సవాల్ విసిరారు. తెలంగాణ కోసం పదవులు మాత్రమే కాదని తమ పార్టీ అధినేత కల్వకుంట్ల చంద్రశేఖర రావు ప్రాణాలే ఫణంగా పెట్టారన్నారు. తెలంగాణ వచ్చే వరకు ఉద్యమం కొనసాగుతుందన్నారు.

ప్రస్తుతం తెలంగాణలోని ప్రతి వ్యక్తి ప్రత్యేక రాష్ట్రం గురించి ఆలోచిస్తున్నాడన్నారు. తెలంగాణ ఉద్యమానికి ఎలాంటి ఢోకా లేదన్నారు. ప్రస్తుత పరిస్థితి చూస్తుంటే తెలంగాణ వచ్చాకే ఉద్యమం ఆగేలా కనిపిస్తోందన్నారు. త్వరలో జరిగే తెలంగాణ గర్జనను విద్యార్థులు విజయవంతం చేయాలని కోరారు. తెలంగాణ ప్రజా ఫ్రంట్ నేత గద్దర్ టిఆర్ఎస్‌పై విమర్శలు మానుకోవాలని లేదంటే ప్రజాకోర్టులో నిలబెడతామని హెచ్చరించారు. టిఆర్ఎస్‌ను ఉద్దేశించి మాట్లాడే హక్కు గద్దర్‌కు లేదన్నారు. కెసిఆర్, కోదండరామ్‌లపై గద్దర్ ఎందుకు విమర్శలు చేస్తున్నారో చెప్పాలన్నారు. తెలంగాణ మంత్రులకు చిత్తశుద్ధి ఉంటే సెప్టెంబర్ 17ను అధికారికంగా నిర్వహించాలని డిమాండ్ చేశారు.

English summary

TRS mla Harish Rao challenged Telugudesam and Congress party on posts. He challenged them that they will ready to throw their posts after Telangana also.