పవన్ కళ్యాణ్ కు తెలంగాణాతో ఏం పని: ప్రొఫెసర్ ఘంటా స్ట్రాంగ్ కౌంటర్!
జనసేన అధినేత, ఆంధ్రప్రదేశ్ ఉపముఖ్యమంత్రి పవన్ కళ్యాణ్ జూన్ 2న తెలంగాణ ఆవిర్భావ దినోత్సవాన్ని 'నవనిర్మాణ దినం'గా హైదరాబాద్లో నిర్వహించాలని ప్రకటించడంపై రాజకీయ దుమారం రేగింది. పవన్ కళ్యాణ్ తాజా ప్రకటనపై తీవ్ర అభ్యంతరం వ్యక్తం చేస్తూ ప్రొఫెసర్ ఘంటా చక్రపాణి ట్వీట్ చేశారు. తెలంగాణ పబ్లిక్ సర్వీస్ కమిషన్ మాజీ చైర్మన్, అంబేద్కర్ ఓపెన్ యూనివర్సిటీ వైస్ ఛాన్సలర్ ఘంటా చక్రపాణి పవన్ కళ్యాణ్ కు షాక్ ఇచ్చారు.
తెలంగాణా వ్యవహారాల్లో పవన్ జోక్యం దేనికి
పవన్ కళ్యాణ్ రాజకీయాల్లో చూపుతున్న దూకుడు సినిమా స్టైల్కు సరిపోతుందని, నిజమైన రాజకీయాలకు అది సరికాదని ఘంటా చక్రపాణి విమర్శించారు. తెలంగాణ పునర్నిర్మాణం కోసం ఇక్కడే బలమైన ముఖ్యమంత్రి, సమర్థవంతమైన ప్రభుత్వం, అనేక రాజకీయ పార్టీలు ఉన్నాయని, వాటి సహకారంతోనే అభివృద్ధి సాధ్యమని ఆయన అన్నారు. ఆంధ్రప్రదేశ్ ఉపముఖ్యమంత్రిగా ఉన్న పవన్కు తెలంగాణ వ్యవహారాల్లో జోక్యం చేసుకోవడం ఎందుకని ప్రశ్నించారు.
హీరో అనిపించుకోవాలనే తాపత్రయంతోనే ఈ కార్యక్రమాలు
కేవలం హీరో అనిపించుకోవాలనే తాపత్రయంతో ఇలాంటి కార్యక్రమాలు చేపట్టడం అనవసరం అని ఘంటా చక్రపాణి ఘాటు వ్యాఖ్యలు చేశారు. తెలంగాణ ఉద్యమకారుల ఆకాంక్షలను గౌరవించాలని, ఇతర రాష్ట్రాల నాయకులు ఇక్కడి వ్యవహారాల్లో జోక్యం చేసుకోకూడదని హెచ్చరించారు. ఆంధ్రప్రదేశ్లో అమరావతి నిర్మాణంపై దృష్టి పెట్టి, అక్కడి అభివృద్ధికి కృషి చేయాలని సూచించారు.
తెలంగాణ ఏర్పాటుకు వ్యతిరేకంగా ఉపవాసం చేసిన వ్యక్తి నవ నిర్మాణం అంటారా?
పవన్ కళ్యాణ్ సోదరులైన చిరంజీవి, నాగార్జునలతో తనకు పాత పరిచయం ఉందని, వారు తెలంగాణ విషయంలో ఎప్పుడూ జోక్యం చేసుకోలేదని ఘంటా చక్రపాణి గుర్తు చేశారు. కానీ పవన్ మాత్రం భిన్నంగా ప్రవర్తిస్తున్నారని విమర్శించారు. తెలంగాణ ఏర్పాటుకు వ్యతిరేకంగా ఉపవాసం చేసిన వ్యక్తి ఇప్పుడు నవనిర్మాణం అని మాట్లాడటం సరికాదని ఆయన అభిప్రాయపడ్డారు.
పవన్ కళ్యాణ్ కార్యక్రమానికి అనుమతించవద్దు
ఈ కార్యక్రమం వల్ల శాంతిభద్రతల సమస్యలు తలెత్తకూడదని, ముఖ్యమంత్రి రేవంత్ రెడ్డి దీనిని అనుమతించవద్దని ఘంటా చక్రపాణి కోరారు. తెలంగాణ ప్రజల భావోద్వేగాలను గౌరవించాలని, ఇలాంటి అనవసర చర్యలు రాజకీయ స్థిరత్వానికి ఉపయోగపడవని హితవు చెప్పారు.ఘంటా చక్రపాణి ట్వీట్ ప్రస్తుతం సోషల్ మీడియాలో చర్చనీయాంశమవుతోంది. తెలంగాణ రాజకీయ నాయకులు, మేధావులు ఈ వ్యాఖ్యలపై వివిధ అభిప్రాయాలు వ్యక్తం చేస్తున్నారు.
సోషల్ మీడియాలో జోరుగా చర్చ
ఒక వైపు ఘంటా చక్రపాణి వాదనను సమర్థిస్తుంటే, మరో వైపు పవన్ అనుచరులు దీనిని తప్పుపట్టుతున్నారు. ఈ ఘటన తెలంగాణ-ఆంధ్రప్రదేశ్ మధ్య రాజకీయ సంబంధాలపై కొత్త చర్చకు దారితీసింది. తెలంగాణ అభివృద్ధి స్థానిక నాయకత్వం ద్వారానే సాధ్యమనే అభిప్రాయం ఘంటా చక్రపాణి తన వ్యాఖ్యల ద్వారా స్పష్టం చేశారు. అయితే ఈ వ్యవహారంలో రేపు ఏం జరగబోతుంది అనేది తెలియాల్సి ఉంది.
Click it and Unblock the Notifications
Sign in with Google