తెలుగుదేశానికి నాగం గుడ్‌బై, నడి రోడ్డు పైనే ప్రెస్ మీట్

By Srinivas

Published: Wednesday, September 7, 2011, 13:32 [IST]

హైదరాబాద్: నాగర్ కర్నూల్ శాసనసభ్యుడు, తెలుగుదేశం పార్టీ బహిష్కృత నేత నాగం జనార్ధన్ రెడ్డి బుధవారం టిడిపికి గడ్‌బై చెప్పారు. నాగంతో పాటు ఆయన వర్గం శాసనసభ్యులు హరీశ్వర్ రెడ్డి సైతం పార్టీ ప్రాథమిక సభ్యత్వానికి రాజీనామా చేశారు. వారు తమ రాజీనామా లేఖను పార్టీ అధ్యక్షుడు నారా చంద్రబాబు నాయుడుకు బుధవారం ఈ-మెయిల్ చేశారు. ఆరు పేజీల లేఖను నాగం, మూడు పేజీల లేఖను హరీశ్వర్ రెడ్డి చంద్రబాబు నాయుడుకు పంపించారు. రాజీనామా లేఖను పంపిన అనంతరం నాగం ఓల్డ్ ఎమ్మెల్యే క్వార్టర్సులో మీడియాతో మాట్లాడటానికి ప్రయత్నించారు. ఆయన వారి ప్రయత్నాన్ని పోలీసులు అడ్డుకున్నారు.

ఓల్డ్ ఎమ్మెల్యే క్వార్టర్సులో ప్రెస్ మీట్ పెట్టవద్దని పోలీసులు చెప్పడంతో వారిపై ఆయన ఆగ్రహం వ్యక్తం చేశారు. అనంతరం నడిరోడ్డుపైనే ఆయన ప్రెస్ మీట్ పెట్టారు. కర్నాటక మాజీ మంత్రి, భారతీయ జనతా పార్టీ నేత గాలి జనార్ధన్ రెడ్డి మైనింగ్ వ్యవహారంలో కేవలం తాము మాత్రమే న్యాయంగా వ్యవహరించామని నాగం తన ప్రెస్ మీట్‌లో అన్నారు. తెలంగాణ వాదం ఎత్తుకున్నందుకే తనను పార్టీ నుండి బహిష్కరించారని ఆరోపించారు. ఈ నెల 9వ తేదిన ఐక్య ఉద్యమ వేదిక ప్రకటిస్తామని చెప్పారు. తెలంగాణపై టిడిపికి స్పష్టమైన వైఖరి లేదన్నారు.

Published On September 7, 2011