చంద్రబాబు తెలంగాణపై లేఖ ఇస్తే చాలు: కెకె

By Pratap

Published: Saturday, September 10, 2011, 16:45 [IST]

హైదరాబాద్‌: తెలంగాణకు అనుకూలంగా పార్టీ ఎన్నికల ప్రణాళికలో ఉన్న అంశాన్ని లేఖ రూపంలో కేంద్ర హోం మంత్రి చిదంబరానికి తెలుగుదేశం పార్టీ అధ్యక్షుడు నారా చంద్రబాబు నాయుడు లేఖ ఇస్తే చాలునని, తెలంగాణ రాష్ట్ర ఏర్పాటుకు మార్గం సుగమం అవుతుందని కాంగ్రెసు తెలంగాణ ప్రాంత నాయకుడు కె. కేశవ రావు అన్నారు. కాంగ్రెసు తెలంగాణ స్టీరింగ్ కమిటీ సమావేశానంతరం ఆయన శనివారం మీడియా ప్రతినిధులతో మాట్లాడారు. చంద్రబాబు లేఖ ఇస్తే తాము కాంగ్రెసుపై ఒత్తిడి పెంచడానికి వీలవుతుందని ఆయన అన్నారు. తెలంగాణకు అనుకూలంగా నిర్ణయం తీసుకున్నప్పుడు చంద్రబాబు మరోసారి లేఖ ఇస్తే తప్పేమిటని అడిగారు.

తెలంగాణ కోసం రాజీనామాలను చేసిన తెలంగాణ ప్రజాప్రతినిధులను లక్ష్యం చేసుకుని దాడులు చేయడం సరి కాదని, ఈ విషయాన్ని తాను తెలంగాణ జెఎసి చైర్మన్ కోదండరామ్‌కు, విద్యార్థులకు చెప్పానని ఆయన అన్నారు. రాజీనామాలు చేయనివారిపై నైతికమైన ఒత్తిడి తేవాలని ఆయన సూచించారు. సకల జనుల సమ్మెలో కాంగ్రెసు శ్రేణులు పాల్గొంటాయని ఆయన చెప్పారు. తెలంగాణ ఉద్యోగులను రెచ్చగొట్టవద్దని ఆయన ప్రభుత్వానికి సూచించారు. తెలంగాణ ఉద్యమం శాంతియుతంగా సాగాలని ఆయన సూచించారు. తమ స్టీరింగ్ కమిటీ తీసుకున్న నిర్ణయాలను కొంత మంది మంత్రులు పాటించకపోవడాన్ని ఆయన తప్పు పట్టారు.

Published On September 10, 2011