రథయాత్రపై ఎల్‌కె అద్వానీకి చిరంజీవి సూచన

By Srinivas

Published: Sunday, September 11, 2011, 9:12 [IST]

హైదరాబాద్: అవినీతికి వ్యతిరేకంగా భారతీయ జనతా పార్టీ అగ్రనేత ఎల్‌కె అద్వానీ తన రథయాత్రను ఓబుళాపురం నుంచి ప్రారంభించాలని కాంగ్రెసు నేత, తిరుపతి శాసనసభ్యుడు చిరంజీవి శనివారం సూచించారు. అక్రమ మైనింగ్‌తో జాతి సంపదను దోచబడిన ఓబుళాపరం నుండి ప్రారంభిస్తే ప్రజలకు మేలు చేసిన వారవుతారని అభిప్రాయపడ్డారు. శనివారం తన క్యాంపు కార్యాలయంలో చిరంజీవి పలువురు నేతలతో భేటీ అయ్యారు. కర్నాటక మాజీ మంత్రి గాలి జనార్ధన్ రెడ్డి ఇంట్లో సోదాలు చేసినప్పుడు బయటపడిన బంగారు సింహాసనం, ఇతర విలువైన వస్తువులు అందరినీ దిగ్భ్రాంతికి గురి చేశాయన్నారు.

జాతీయ సంపద కొందరి చేతుల్లోకి అక్రమంగా వెళుతోందని ఆవేదన వ్యక్తం చేశారు. వైయస్సార్సీ పార్టీ అధ్యక్షుడు వైయస్ జగన్మోహన్ రెడ్డి వెంట వెళ్లిన శాసనసభ్యులు తిరిగి వెనక్కి రావాలనుకోవడం శుభ పరిణామం అన్నారు. ఎమ్మార్ వ్యవహారంలో తన ప్రమేయం లేదని తెలుగుదేశం పార్టీ అధినేత నారా చంద్రబాబు నాయుడు చెప్పడం విడ్డూరంగా ఉందన్నారు. రాజీవ్ యువకిరణాలు మంచి పథకమని అది లక్ష్యం సాధిస్తే యువత శక్తి సామర్థ్యాలు సద్వినియోగం అవుతాయన్నారు. కాగా వ్యక్తిగత పనుల వల్ల మలేషియా వెళుతున్న చిరంజీవికి నేతలు వీడ్కోలు తెలిపారు.

Published On September 11, 2011