సిబిఐ కస్టడీని సవాల్ చేస్తూ హైకోర్టుకు వెళ్లిన గాలి

By Srinivas

Published: Wednesday, September 14, 2011, 16:02 [IST]

హైదరాబాద్: కర్నాటక మాజీ మంత్రి గాలి జనార్ధన్ రెడ్డి, ఒఎంసి డైరెక్టర్ శ్రీనివాస్ రెడ్డి తమ సిబిఐ కస్టడీని సవాల్ చేస్తూ బుధవారం రాష్ట్ర అత్యున్నత న్యాయస్థానం హైకోర్టును ఆశ్రయించారు. వారి పిటిషన్‌ను హైకోర్టు స్వీకరించింది. కాగా గాలి జనార్ధన్ రెడ్డి, శ్రీనివాస్ రెడ్డిలు కోఠిలోని సిబిఐ కార్యాలయంలో సిబిఐ అధికారుల విచారణకు హాజరయ్యారు. గాలి తరఫు న్యాయవాదుల సమక్షంలో అధికారులు వారిని విచారిస్తున్నారు. ఇప్పటికే గాలి, శ్రీనివాస్ రెడ్డిలు సిబిఐ కస్టడీలో ఉన్న విషయం తెలిసిందే. మూడు రోజుల పాటు సిబిఐ, గాలి తరఫు న్యాయవాదుల వాదనలు విన్న నాంపల్లి ప్రత్యేక కోర్టు మంగళవారం వారిని సిబిఐ కస్టడీకి అప్పగిస్తూ జడ్జిమెంట్ ఇచ్చింది.

మరోవైపు సిబిఐ అధికారుల ముందు తిరుమల తిరుపతి దేవస్థానం అధికారులు హాజరయ్యారు. గాలి జనార్ధన్ రెడ్డి శ్రీవారికి బహూకరించిన బంగారు కిరీటం విషయంలో వారు సిబిఐ ముందు హాజరయ్యారు. మీనాక్షి ఎనర్జీ ప్రైవేట్ లిమిటెడ్, శివ క్రెడిక్స్ లిమిటెడ్, జగతి పబ్లికేషన్స్ ప్రతినిధులు సిబిఐ ముందు బుధవారం హాజరైన వారిలో ఉన్నారు.

Published On September 14, 2011