అది కెసిఆర్ క్రెడిట్: డిసెంబర్ 9 ప్రకటనపై కెకె

హైదరాబాద్: రెండేళ్ల క్రితం డిసెంబర్ 9న కేంద్ర ప్రభుత్వం తెలంగాణకు అనుకూలంగా ప్రకటన చేయడం తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు క్రెడిటేనని కాంగ్రెసు పార్టీ సీనియర్ నేత, రాజ్యసభ సభ్యుడు కె కేశవ రావు బుధవారం అన్నారు. సకల జనుల సమ్మెలో భాగంగా హైదరాబాదులోని ఇందిరా పార్కు వద్ద తెలంగాణ జర్నలిస్టులు చేస్తున్న ధర్నాకు కెకె, టిఆర్ఎస్ సిద్దిపేట శాసనసభ్యుడు హరీష్ రావు మద్దతు పలికారు. రాజీనామాలు ఆమోదింప చేసుకుంటే తెలంగాణ వస్తుందని చెబితే తమ రాజీనామాలు ఇప్పుడే ఆమోదింప చేసుకోవడానికి సిద్ధంగా ఉన్నామని కెకె అన్నారు. తెలంగాణ ఇవ్వాలనుకుంటజే ఇవ్వండి. కానీ గందర గోళ ప్రకటనలతో ప్రజలను మోసపుచ్చ వద్దని హెచ్చరించారు. తెలంగాణను దేవుడు కూడా ఆపలేడన్నారు.

తమకు జీతాలు ముఖ్యం కాదని తెలంగాణనే ప్రజల భవిష్యత్తు కోసం ప్రత్యేక తెలంగాణే ముఖ్యమని హరీష్ రావు అన్నారు. సకల జనుల సమ్మెపై మీడియా తప్పుడు కథనాలు ప్రచురిస్తోందని ఆరోపించారు. తెలంగాణ ప్రాంత కాంగ్రెసు ప్రజా ప్రతినిధులు పదవులు ముఖ్యమనే భ్రమలో ఉన్నారన్నారు. తెలుగుదేశం పార్టీ ప్రజా ప్రతినిధులు సైతం పదవుల కోసం పాకులాడుతున్నారన్నారు. తెలంగాణ కోసం సమ్మె జరుగుతుంటే మంత్రులు మాత్రం ముఖ్యమంత్రి కిరణ్ కుమార్ రెడ్డికి శుభాకాంక్షలు చెప్పేందుకు లైన్ కట్టారని విమర్శించారు.

English summary

Congress senior MP K Keshav Rao said today that December 9th central government statement credit is goes to TRS chief K Chandrasekhar Rao.