ఉద్యమాలతో తెలంగాణ రాదు: సిఎం కిరణ్ కుమార్ రెడ్డి

By Srinivas

Published: Thursday, September 15, 2011, 12:30 [IST]

రాజమండ్రి/గుంటూరు: ఉద్యమాలతో తెలంగాణ రాదని ముఖ్యమంత్రి కిరణ్ కుమార్ రెడ్డి గురువారం రాజమండ్రిలో అన్నారు. తూర్పు గోదావరి జిల్లా ఒక్క రోజు పర్యటనలో భాగంగా ఆయన రాజమండ్రి విమానాశ్రయంలో దిగిన అనంతరం మీడియాతో మాట్లాడారు. సకల జనుల సమ్మె వల్ల ప్రజలు ఇబ్బందులు ఎదుర్కొనడం తప్పితే ఎలాంటి ప్రయోజనం ఉండదన్నారు. సమ్మె వల్ల ప్రత్యేక రాష్ట్రం రాదన్నారు. సమ్మెల వల్ల తెలంగాణ ప్రజలే ఇబ్బందులు పడుతున్నారన్నారు. ఉద్యోగులు సమ్మెను వెంటనే విరమించాలని ఆయన కోరారు. సింగరేణిలో బొగ్గు ఉత్పత్తిని ఆపి వేయడం వల్ల నష్టం కలుగుతోందన్నారు. మోహన్ కందా నివేదికను పరిశీలించి నిర్ణయం తీసుకుంటామని చెప్పారు. రెండు రోజుల్లోగా నిర్ణయం ఉంటుందన్నారు. జనవరిలోగా ఉద్యోగాలు ఉంటాయన్నారు. విమానం కాసేపు గాలిలో చక్కర్లు కొట్టడం వల్ల ఆందోళనకు గురయ్యామన్నారు. కాగా అంతకుముందు సుమారు అర్ధగంట పాటు సిఎం విమానం చక్కర్లు కొట్టిన విషయం తెలిసిందే.

విభజన వాదంతో రాష్ట్ర అభివృద్ధి వెనకబడుతోందని కేంద్ర మంత్రి పనబాక లక్ష్మి గురువారం గుంటూరు జిల్లాలో అన్నారు. రాజకీయ లబ్ధి కోసమే కొందరు ప్రత్యేకవాదం పేరుతో గొడవలు సృష్టిస్తున్నారని ఆరోపించారు. ఉద్యమాల కారణంగా రాష్ట్రానికి రావాల్సిన పెట్టుబడులు వెనక్కి తరలి పోతున్నాయని ఆవేదన వ్యక్తం చేశారు. రాష్ట్ర అభివృద్ధికి ఇది ఆటంకంగా మారుతోందన్నారు. సకల జనుల సమ్మెను విరమింప చేయడానికి ప్రభుత్వం తీవ్రంగా ప్రయత్నిస్తోందన్నారు. బొగ్గు ఉత్పత్తులు నిలిచిపోతే విద్యుత్‌పై ప్రభావం పడుతుందన్నారు. ఆ ప్రభావం తెలంగాణ ప్రాంతానికీ వర్తిస్తుందన్నారు.

Published On September 15, 2011