సమ్మెకు బెదిరి దొడ్డిదారి పట్టిన సిఎం కిరణ్ కుమార్

By Srinivas

Published: Tuesday, September 20, 2011, 13:42 [IST]

హైదరాబాద్: తెలంగాణ వ్యాప్తంగా జరుగుతున్న సకల జనుల సమ్మె సెగ ముఖ్యమంత్రి కిరణ్ కుమార్ రెడ్డికి సైతం తగిలింది. ఉద్యోగుల సమ్మె కారణంగా ముఖ్యమంత్రి మంగళవారం దొడ్డిదారిన సచివాలయంలోకి వెళ్లాల్సి వచ్చింది. సచివాలయ ప్రధాన ద్వారం వద్ద మంగళవారం తెలంగాణ కార్యాలయ ఉద్యోగులు ఆందోళన చేస్తున్నారు. అదే సమయంలో ముఖ్యమంత్రి సచివాలయానికి వచ్చారు. అయితే సిఎంను ఉద్యోగులు ఎక్కడ అడ్డుకుంటాయోనన్న భయంతో భద్రతా దళాలు ఆయనను ప్రధాన ద్వారం గుండా కాకుండా వెనుక ద్వారం నుండి లోనికి తీసుకు వెళ్లారు.

అనంతరం ముఖ్యమంత్రి అధికారులతో భేటీ అయ్యారు. సకల జనుల సమ్మెపై చర్చించారు. సమ్మెలో పాల్గొంటున్న ఉద్యోగులకు జీతాలు ఇవ్వకూడదని అధికారులను ఆదేశించినట్లుగా తెలుస్తోంది. అయితే అలా చేయడం కుదరదని అధికారులు చెప్పటంతో బెదిరింపు ధోరణులకు వెళ్లాలని ఆయన అధికారులను ఆదేశించినట్లుగా తెలుస్తోంది. అదీ సాంకేతికంగా సాధ్యం కాదని ముఖ్యమంత్రి దృష్టికి అధికారులు తీసుకు వచ్చినట్లుగా తెలుస్తోంది. కాగా సోమవారం నిజాం కళాశాల, ఉస్మానియా విశ్వవిద్యాలయాల్లో విద్యార్థులపై పోలీసుల చేసిన దౌర్జన్యాన్ని హెచ్చార్సీకి ఫిర్యాదు చేశారు.

Published On September 20, 2011