జగన్ కోసం సిద్ధంగా ఉండండి: విద్యార్థులకు మేకపాటి

By Srinivas

Published: Friday, September 23, 2011, 15:33 [IST]

హైదరాబాద్: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిపై ప్రభుత్వం చేస్తున్న కుట్రలను ఎదుర్కొనడానికి విద్యార్థులు సిద్ధంగా ఉండాలని శ్రీ పొట్టి శ్రీరాములు నెల్లూరు జిల్లా పార్లమెంటు సభ్యుడు మేకపాటి రాజమోహన్ రెడ్డి శుక్రవారం సూచించారు. జగన్‌ను సిబిఐ పేరుతో ప్రభుత్వం వేధిస్తే అడ్డుకునేందుకు సిద్ధంగా ఉండాలన్నారు. దివంగత ముఖ్యమంత్రి వైయస్ రాజశేఖర రెడ్డిని రాష్ట్ర ప్రజలు మరిచిపోయే కుట్రలకు ప్రభుత్వం పూనుకుంటోందన్నారు. వైయస్ ప్రవేశ పెట్టిన ప్రజా సంక్షేమ పథకాలను ప్రభుత్వం నిర్వీర్యం చేస్తోందని ఆరోపించారు. వైయస్ తన పాలనలో విద్యార్థులకు పెద్ద పీట వేశారన్నారు.

విద్యార్థులు రాజకీయాల్లో ప్రధాన భూమిక పోషించాలని తిరుమల తిరుపతి దేవస్థానం మాజీ చైర్మన్ భూమన కరుణాకర్ రెడ్డి తిరుపతిలో అన్నారు. విద్యార్థులు చదువుకు ప్రాధాన్యత ఇస్తూ రాజకీయాల్లో ప్రముఖంగా ఉండాలని సూచించారు. కాగా దివంగత ముఖ్యమంత్రి వైయస్ రాజశేఖర రెడ్డి విగ్రహాలను పలువురు ధ్వంసం చేస్తున్నారని అలా ధ్వంసం చేస్తే ఊరుకునేది లేదని వరంగల్ జిల్లా వైయస్సార్సీ పార్టీ నేత హెచ్చరించారు.

Published On September 23, 2011