పదకొండో రోజుకు చేరిన సకల జనుల సమ్మె

హైదరాబాద్: సకల జనుల సమ్మె శుక్రవారం పదకొండో రోజుకు చేరుకుంది. తెలంగాణ వ్యాప్తంగా ఉద్యోగులు, ప్రజలు సమ్మెను స్వచ్చంధంగా పాటిస్తున్నారు. పార్టీలకతీతంగా తెలంగాణ ప్రాంత ప్రజా ప్రతినిధులు సైతం సమ్మెకు మద్దతు పలుకుతున్నారు. ఆర్టీసీ ఉద్యోగులు విధులకు గైర్హాజరవుతూ తమ సమ్మెను కొనసాగిస్తున్నారు. గ్రేటర్ హైదరాబాద్ మునిసిపల్ కార్పొరేషన్ కార్మికులు మాత్రం కాస్త తగ్గి అత్యవసర సేవలు చేసేందుకు ముందుకు వచ్చారు. దీంతో నగరంలో పారిశుద్ధ్యం పనులు శుక్రవారం నుండి ప్రారంభమయ్యే అవకాశమున్నాయి. వైద్యులు సైతం అత్యవసర సేవలను మాత్రమే కొనసాగిస్తూ సకల జనుల సమ్మెకు దన్నుగా నిలుస్తున్నారు.

కాగా 24, 25 తేదీల్లో రెండు రోజుల పాటు తెలంగాణవాదులు రైల్ రోకో నిర్వహిస్తున్నారు. దీంతో రైల్వే అధికారులు తెలంగాణ జిల్లాల నుండి వెళ్లాల్సిన పలు రైళ్లను రద్దు చేయడం, కొన్నింటిని దారి మళ్లించడం వంటివి చేస్తున్నారు. శుక్రవారం అర్ధరాత్రి నుండి రెండు రోజుల పాటు ఆటోలు నగరంలో తిరగవు. ఆటో యూనియన్లు సమ్మెకు మద్దతుగా రెండు రోజుల పాటు బంద్ పాటించనున్నాయి.

English summary

Sakala Janula Strike is continuing on eleventh day today.