మంత్రిని, కాంగ్రెసు ఎంపిలను అరెస్టు చేసిన పోలీసులు

హైదరాబాద్: రైతులకు ఏడు గంటలు విద్యుత్తు ఇవ్వాలని డిమాండ్ చేస్తూ ధర్నాకు దిగిన మంత్రి కోమటిరెడ్డి వెంకటరెడ్డిని, కాంగ్రెసు పార్లమెంటు సభ్యులను పోలీసులు అరెస్టు చేశారు. మంత్రితో పాటు పార్లమెంటు సభ్యులు మధుయాష్కీ, పొన్నం ప్రభాకర్, రాజయ్య, మాజీ మంత్రి జూపల్లి కృష్ణారావు, తెలంగాణ రాష్ట్ర సమితి (తెరాస) శాసనసభ్యులు ఈటెల రాజేందర్, కెటి రామారావులను పోలీసులు సోమవారం సాయంత్రం అరెస్టు చేశారు. వారిని పోలీసు స్టేషనుకు తరలించారు. మంత్రులను, ఎంపిలను కూడా పోలీసులు అరెస్టు చేస్తున్నారంటే పరిస్థితి ఏ విధంగా ఉందో అర్థం చేసుకోవచ్చునని పొన్నం ప్రభాకర్ అన్నారు. ఉద్యమం విషయంలో తమకు ఎవరి సర్టిఫికెట్ అవసరం లేదని ఆయన అన్నారు. ఉద్యమంలో కలిసిరానివారిని తరిమి కొట్టాలని ఆయన పిలుపునిచ్చారు.

కాగా, విమలక్క నాయకత్వంలోని తెలంగాణవాదులు 30 మంది నానక్‌రాం గుడాలోని ఎమ్మార్ ప్రాపర్టీస్ కార్యాలయం భవనంపైకి ఎక్కి ఆత్మహత్య చేసుకుంటామని బెదిరిస్తున్నారు. తెలంగాణవాదులు ఎమ్మార్ ప్రాపర్టీస్ కార్యాలయంలోకి చొరబడి ఫర్నీచర్‌ను ధ్వంసం చేశారు. అద్దాలు పగులగొట్టారు. ఆ తర్వాత మూడో అంతస్థుపైకి ఎక్కి బెదిరిస్తున్నారు. పోలీసులు లోపలికి రావడానికి ప్రయత్నిస్తే తాము కిందికి దూకుతామని వారు హెచ్చరిస్తున్నారు. దీంతో వారిని కిందికి రాబట్టేందుకు పోలీసులు తీవ్ర ప్రయత్నాలు చేస్తున్నారు. ఇదిలావుంటే, సచివాలయాన్ని ముట్టడించడానికి ప్రయత్నించిన గద్గర్‌ను, ఇతర తెలంగాణవాదులను పోలీసులు పబ్లిక్ గార్డన్ వద్ద అరెస్టు చేశారు.

English summary

Minister Komatireddy Venkat Reddy, Congress MPs and TRS MLAs arrested for staging dharna in front of Vidyuth Soudha.