స్వామిగౌడ్‌ను చంపే ప్రయత్నం జరిగింది: కెసిఆర్

హైదరాబాద్: ప్రభుత్వంపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తీవ్ర ఆరోపణ చేశారు. కేర్ ఆస్పత్రిలో చికిత్స పొందుతున్న తెలంగాణ ఉద్యోగ సంఘాల జెఎసి నాయకుడు స్వామిగౌడ్‌ను ఆయన సోమవారం సాయంత్రం పరామర్శించారు. స్వామి గౌడ్‌కు తగిలిన గాయాలను చూస్తుంటే ఉద్దేశ్యపూర్వకంగానే గాయపరిచినట్లు అర్థమవుతోందని ఆయన అన్నారు. ఈ విషయంపై మానవ హక్కుల కమిషన్‌కు ఫిర్యాదు చేస్తామని ఆయన చెప్పారు. డిసిపి స్టీఫెన్ రవీంద్రను సస్పెండ్ చేయాలని ఆయన డిమాండ్ చేశారు. తెలంగాణ నిప్పుతో ఆడుకుంటే కిరణ్ కుమార్ రెడ్డి కుర్చీ కదలుతుందని ఆయన హెచ్చరించారు.

స్వామిగౌడ్‌ను తెలంగాణ రాజకీయ జెఎసి చైర్మన్ కోదండరామ్ కూడా పరామర్శించారు. తెలంగాణ ఉద్యమంతో ముఖ్యమంత్రి కిరణ్ కుమార్ రెడ్డి నిరాశానిస్పృహల్లో ఉన్నారని ఆయన అన్నారు. స్వామిగౌడ్‌పై దాడికి నిరసనగా రేపు ర్యాలీలు, ప్రదర్శనలు నిర్వహించనున్నట్లు ఆయన తెలిపారు. తమ ఉద్యమం గాంధేయ మార్గంలో సాగుతోందని ఆయన చెప్పారు. తెలంగాణ నగారా నేతలు నాగం జనార్దన్ రెడ్డి, హరీశ్వర్ రెడ్డి, తెరాస శాసనసభ్యుడు ఈటెల రాజేందర్, తెలంగాణ ప్రజాఫ్రంట్ అధ్యక్షుడు గద్దర్ తదితరులు స్వామిగౌడ్‌ను పరామర్శించారు. ఆర్‌టిఎ కార్యాలయం వద్ద తీవ్ర ఉద్రిక్తత చోటు చేసుకున్న నేపథ్యంలో సోమవారం ఉదయం స్వామి గౌడ్ అస్వస్థతకు గురై ఆస్పత్రిలో చేరారు.

English summary

TRS president K Chandrasekhar Rao alleged that conspiracy has hatched to kill Swami Goud.