శంకర రావు అలిగిన వేళ, ఎంపితో వాగ్వాదం

By Srinivas

Published: Thursday, September 29, 2011, 13:44 [IST]

హైదరాబాద్: చేనేత, జౌళీ శాఖ మంత్రి శంకర రావుకు గురువారం ఒక్కసారిగా పార్లమెంటు సభ్యుడు అంజన్ కుమార్ యాదవ్‌పై కోపం వచ్చింది. ఇరువురు పరస్పరం వాగ్వాదం చేసుకున్నారు. అంతలోనే అలకబూనిన శంకర రావు అక్కడి నుండి వెనుదిరిగారు. ఈ సంఘటన ముషీరాబాద్ కొత్త పోలీసు స్టేషన్ ప్రారంభోత్సవంలో జరిగింది. ఈ పోలీసు స్టేషన్‌ను గురువారం రాష్ట్ర డైరెక్టర్ జనరల్ ఆఫ్ పోలీసు దినేష్ రెడ్డి ప్రారంభించారు. ఈ సందర్భంగా ఎంపీ అంజన్ కుమార్ యాదవ్, మంత్రి శంకర రావు మధ్య ప్రోటోకాల్ వివాదం తలెత్తింది. దీంతో ఇరువురు వాగ్వాదానికి దిగారు.

పరస్పరం దూషించుకున్నారు. అయితే అక్కడే ఉన్న అధికారులు వారిద్దరికీ సర్ది చెప్పే ప్రయత్నాలు చేశారు. మంత్రి శంకర రావు అక్కడి నుండి అలిగి వెళ్లి పోయారు. అనంతరం శంకర రావు గవర్నర్ నరసింహన్‌తో భేటీ అయ్యారు. ఆ తర్వాత ఆయన మాట్లాడుతూ తనపై ఎవరు ఎన్ని కుట్రలు చేసిన అవినీతికి వ్యతిరేకంగా పోరాటం చేస్తూనే ఉంటానని చెప్పారు. మంత్రిగా ఉన్నా, మంత్రిగా ఉన్నా సామాన్యుడిగా ఉన్నా ఎలా ఉన్నా తాను అవినీతిపై పోరాటం మాత్రం ఆపేది లేదన్నారు.

Published On September 29, 2011