కేంద్ర పాలిత ప్రాంతంగా హైదరాబాద్ పుకార్లేనా?

By Pratap

Published: Friday, September 30, 2011, 11:13 [IST]

న్యూఢిల్లీ: రాష్ట్ర విభజన చేసి హైదరాబాదును కేంద్ర పాలిత ప్రాంతంగా చేస్తారనేది పుకార్లేనని అంటున్నారు. అది ప్రచారం మాత్రమేనని ప్రదేశ్ కాంగ్రెసు కమిటీ (పిసిసి) అధ్యక్షుడు బొత్స సత్యనారాయణ స్వయంగా చెప్పారు. అటువంటి ప్రతిపాదన ఏదీ లేదని ఆయన అన్నారు. కేంద్ర మంత్రుల మధ్య నెలకొన్న 2జి స్పెక్ట్రమ్ వివాదం సద్దుమణిగిన నేపథ్యంలో కాంగ్రెసు పార్టీ అధిష్టానం తెలంగాణపై దృష్టి సారిస్తోంది. తెలంగాణపై కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ శుక్రవారం మధ్యాహ్నం సోనియాకు నివేదిక సమర్పించనున్న నేపథ్యంలో తీవ్ర ఉత్కంఠ నెలకొంది. ఆయన చేయబోయే సిఫార్సులపై విరివిగా ప్రచారం సాగుతోంది. ఒకదానికి మరోదానికి సంబంధం లేని కథనాలు వస్తున్నాయి.

పిసిసి అధ్యక్షుడు బొత్స సత్యనారాయణ గురువారం సాయంత్రం గులాం నబీ ఆజాద్‌తో సమావేశమై చర్చించారు. తెలంగాణపై నిర్ణయం తీసుకునే విషయంలో బొత్స సత్యనారాయణ వెసులుబాటు కలిగిస్తున్నట్లు సమాచారం. శుక్రవారం సాయంత్రం జరిగే పార్టీ కోర్ కమిటీ సమావేశంలో ఆ నివేదికపై చర్చ జరిగే అవకాశం ఉంది. ఆ తర్వాత తెలంగాణపై అక్టోబర్ 3 లేదా 4వ తేదీన మరోసారి కోర్ కమిటీ సమావేశమయ్యే అవకాశాలున్నాయి. ఈ సమావేశానికి ముఖ్యమంత్రి కిరణ్ కుమార్ రెడ్డిని కూడా ఆహ్వానిస్తారు. ఈ సమావేశంలో తెలంగాణపై తుది నిర్ణయం తీసుకోవచ్చునని అంటున్నారు.

ఇదిలా వుంటే, మహాత్మా గాందీ జయంతి కార్యక్రమంలో పాల్గొనడానికి పార్లమెంటు సభ్యుడు లగడపాటి రాజగోపాల్ ఆజాద్‌ను విజయవాడకు ఆహ్వానించారు. అయితే, ఈ సమావేశానికి ఆజాద్ వస్తారా, వస్తే సమైక్యవాదుల నుంచి ఎటువంటి ప్రతిఘటన ఎదురవుతుందనేది చర్చనీయాంశంగా మారింది.

Published On September 30, 2011