కెసిఆర్‌తో రహస్య భేటీ, 7న జానా రెడ్డి రాజీనామా?

By Pratap

Published: Monday, October 3, 2011, 9:11 [IST]

న్యూఢిల్లీ: తెలంగాణ కోసం మరో మంత్రి రాజీనామా బాట పట్టనున్నారు. సీనియర్ మంత్రి కె. జానా రెడ్డి ఈ నెల 7వ తేదీన తన మంత్రి పదవికి, శాసనసభా సభ్యత్వానికి రాజీనామా చేయాలని నిర్ణయించుకున్నట్లు సమాచారం. నల్లగొండ జిల్లాకు చెందిన కోమటిరెడ్డి వెంకటరెడ్డి మాదిరిగానే జానా రెడ్డి కూడా తన రాజీనామా లేఖను నేరుగా గవర్నర్ నరసింహన్‌కు సమర్పించాలని అనుకుంటున్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో రహస్య సమావేశం అనంతరం ఆయన ఈ నిర్ణయం తీసుకున్నట్లు చెబుతున్నారు. తెలంగాణ జెఎసి నుంచి, తన సొంత కాంగ్రెసు పార్టీ శాసనసభ్యుల నుంచి వస్తున్న ఒత్తిడి మేరకు ఆయన రాజీనామా చేయాలని అనుకుంటున్నట్లు తెలుస్తోంది.

కెసిఆర్‌తో జానా రెడ్డితో పాటు రాజ్యసభ సభ్యుడు కె. కేశవరావు కూడా సమావేశమయ్యారు. తెలంగాణ జెఎసి నేతలు కూడా ఈ సమావేశంలో పాల్గొన్నారు. మంత్రి పదవికి రాజీనామా చేస్తూ నేరుగా గవర్నర్‌కు లేఖ ఇవ్వాలని, అప్పుడే ప్రజల్లో విశ్వాసం కలుగుతుందని కెసిఆర్‌తో పాటు జెఎసి నేతలు జానా రెడ్డికి సూచించినట్లు సమాచారం. ప్రభుత్వాన్ని కాపాడుతూ పదవుల్లో కొనసాగితే తెలంగాణ సాధించడం సాధ్యం కాదని వారు చెప్పినట్లు తెలుస్తోంది. మరో పదిహేను రోజులు వేచి చూద్దామన్న జానా రెడ్డి సూచనను కెసిఆర్ వ్యతిరేకించినట్లు తెలుస్తోంది. కెసిఆర్‌తో భేటీపై జానా రెడ్డిని సంప్రదించగా, మా బాధలు మేం చెప్పుకున్నాం, ఆయన బాధలు ఆయన చెప్పుకున్నారని అన్నట్లు ఓ ప్రముఖ దినపత్రిక రాసింది.

Published On October 3, 2011