బొత్స సమక్షంలో జెసి వర్సెస్ రఘువీరా రెడ్డి వర్గం

By Srinivas

Published: Monday, October 3, 2011, 11:29 [IST]

అనంతపురం: జిల్లాలో మాజీ మంత్రి, కాంగ్రెసు పార్టీ సీనియర్ శాసనసభ్యుడు జెసి దివాకర్ రెడ్డి, మంత్రి రఘువీరా రెడ్డి వర్గాల మధ్య విభేదాలు మరోసారి బయటపడ్డాయి. సోమవారం ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ సాక్షిగా విభేదాలు వెలుగు చూశాయి. జిల్లాలో మూడు రోజుల పర్యటనకు బొత్స వచ్చారు. ఈ సందర్భంగా జెసి వర్గీయులు, రఘువీరా వర్గీయులు వేరు వేరుగా ఆయనకు స్వాగతం పలికారు. బొత్స వాహనం ఎక్కేందుకు సైతం జెసి దివాకర్ రెడ్డి నిరాకరించారు. దీంతో రఘువీరా, జెసి మధ్య వర్గ పోరు బొత్స ఎదుటే బహిర్గతమైనట్టయింది.

గతంలోనూ పలుసార్లు ఇరువర్గాల మధ్య వర్గ పోరు బయట పడిన విషయం తెలిసింది. ఇటీవలె జిల్లా పార్టీ సమావేశం తీవ్ర ఉద్రిక్తతకు దారి తీసింది. జెసి దివాకర్ రెడ్డి సోదరుడు జెసి ప్రభాకర్ రెడ్డి సమావేశానికి వచ్చిన సమయంలో జెసి వర్గీయులు, రఘువీరా వచ్చినప్పుడు ఆయన వర్గీయులు వారికి అనుకూలంగా నినాదాలు చేశారు. దీంతో జిల్లా సమావేశం కాస్త రసాభాసగా మారింది. గత కొన్నాళ్లుగా ఇరు వర్గాల మధ్య పోరు నడుస్తోంది. తరుచూ జెసి దివాకర్ రెడ్డి సైతం జిల్లాలోని కాంగ్రెసు నేతలంతా ఎప్పటికైనా జగన్ వెంట వెళతారని తాము మాత్రమే చివరి వరకు కాంగ్రెసులో ఉంటామని అంటుంటారు.

Published On October 3, 2011