ఎవరితోనైనా కలిసి పనిచేస్తాం: తెలంగాణ కాంగ్రెసు

By Pratap

Published: Monday, October 3, 2011, 19:33 [IST]

న్యూఢిల్లీ: తెలంగాణ సమస్య పరిష్కారం కాకపోతే తాము ఎవరితోనైనా కలిసి పనిచేస్తామని తెలంగాణ కాంగ్రెసు నాయకులు తేల్చి చెప్పారు. నాలుగు అంశాలతో వారు సోమవారం ప్రధాని మన్మోహన్ సింగ్‌కు లేఖ రాశారు. తీవ్రమైన చర్చల అనంతరం వారు ఈ లేఖ రాశారు. తెలంగాణ మంత్రులు పెట్టదలుచుకున్న మీడియా సమావేశాన్ని ఈ నేపథ్యంలోనే రద్దు చేసుకున్నట్లు సమాచారం. తెలంగాణ అంశాన్ని సాధ్యమైనంత త్వరగా తేల్చాలని వారు ప్రధానిని డిమాండ్ చేశారు. తెలంగాణ సకల జనుల సమ్మెపై వెంటనే చర్యలు తీసుకోవాలని వారు కోరారు. విద్యుత్తు కొనుగోలు చేసి అంతరాయం లేకుండా సరఫరా చేయాలని కూడా వారు కోరారు.

తెలంగాణ కోసం తాము ఏ ఆందోళనాకార్యక్రమం చేపట్టినా పార్టీ ధిక్కరణ కాదని మంత్రి కె. జానా రెడ్డి అన్నారు. క్రమశిక్షణ కలిగిన కాంగ్రెసు కార్యకర్తలుగా తెలంగాణ సాధిస్తామని ఆయన అన్నారు. రాజీనామాలు చేయాల్సిన పరిస్థితులు ఉత్పన్నం కావని కూడా ఆయన అన్నారు. పార్టీని వీడేది లేదని, కాంగ్రెసులోనే ఉంటామని ఆయన చెప్పారు. తాము చేపట్టే కార్యక్రమాలు పార్టీ మనుగడను కాపాడేదిగా ఉంటుందని ఆయన అన్నారు. తెలంగాణ సమస్యను సాధ్యమైనంత త్వరగా తేల్చాలని తెలంగాణ కాంగ్రెసు నేతలు ప్రధానిని కోరారు. తెలంగాణపై స్పష్టత కోసమే తాము ఢిల్లీకి వచ్చామని ఆయన చెప్పారు. తమ ఉనికే ప్రశ్నార్థకంగా మారినప్పుడు పార్టీని ఎలా కాపాడగలమని వారంటున్నారు. కాగా, తెలంగాణ ఉద్యమం శాంతియుతంగా ఉంది, ఉండాలని జానా రెడ్డి అన్నారు.

Published On October 3, 2011