ప్రణబ్ తెలంగాణ వ్యాఖ్యలపై కెసిఆర్ నో కామెంట్

By Pratap

Published: Wednesday, October 5, 2011, 15:07 [IST]

న్యూఢిల్లీ: తెలంగాణపై కేంద్ర మంత్రి ప్రణబ్ ముఖర్జీ చేసిన వ్యాఖ్యలపై మాట్లాడడానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మాట్లడడానికి నిరాకరించారు. ప్రణబ్ ముఖర్జీ ప్రకటనను పరిశీలించిన తర్వాత మాట్లాడుతానని ఆయన అన్నారు. బుధవారం ఢిల్లీ నుంచి హైదరాబాదు బయలుదేరే ముందు ఆయన మీడియా ప్రతినిధులతో మాట్లాడారు. తాను తిరిగి 11వ తేదీన ఢిల్లీ వస్తానని, రెండు మూడు రోజులు ఉంటానని, అప్పుడు కేంద్ర మంత్రులు ప్రణబ్ ముఖర్జీ, ఎకె ఆంటోనీలను కలుస్తానని ఆయన చెప్పారు. ఇప్పుడే కలవాలని అనుకున్నాను గానీ వారు అందుబాటులో లేరని ఆయన అన్నారు.

కాగా, తెలంగాణపై సిపిఐ ప్రధాన కార్యదర్శి ఎబి బర్దన్ ప్రధాని మన్మోహన్ సింగ్‌కు లేఖ రాశారు. తెలంగాణ రాష్ట్ర ఏర్పాటుకు చర్యలు తీసుకోవాలని ఆయన ప్రధానిని కోరారు. ఇరు ప్రాంతాల ప్రజలు అన్నదమ్ముల్లా విడిపోవడానికి అవకాశం కల్పించాలని ఆయన అన్నారు. తెలంగాణ జెఎసి నేతలతో కలిసి కెసిఆర్ ఢిల్లీలో బర్దన్‌తో చర్చలు జరిపిన విషయం తెలిసిందే. తాము తెలంగాణకు అనుకూలంగా ఉన్నామని బర్దన్ వారికి చెప్పారు. ఆ మేరకు ప్రధానికి ఆయన లేఖ రాశారు.

Published On October 5, 2011