తిరుపతిలో చిరంజీవికి మరోమారు చుక్కెదురు

By Srinivas

Published: Wednesday, October 5, 2011, 10:06 [IST]

తిరుపతి: శాసనసభ్యుడు చిరంజీవికి సొంత నియోజకవర్గం తిరుపతిలో మరోసారి చుక్కెదురైంది. నియోజకవర్గంలో ఒక్క రోజు పర్యటన కోసం ఆయన బుధవారం హైదరాబాదు నుండి తిరుపతి వెళ్లారు. రేణిగుంట విమానాశ్రయంలో దిగిన ఆయనకు స్వాగతం పలకడానికి ఎవరూ రాలేదు. నియోజకవర్గం ఎమ్మెల్యే మాత్రమే కాకుండా ప్రజాధరణ కలిగిన చిరంజీవికి స్వాగతం పలకడానికి ఎవరూ రాకపోవడం విశేషం. రేణిగుంట విమానాశ్రయం నుండి తిరుపతి చేరుకున్న చిరంజీవి నియోజకవర్గంలో పర్యటించారు. ఈ సందర్భంగా ఆయన తెలంగాణ ఉద్యమకారుల తీరును తప్పు పట్టారు. ఉద్యమకారులు సకల జనుల సమ్మె పేరుతో ప్రభుత్వంపై ఒత్తిడి తెచ్చే కార్యక్రమాలు చేపట్టకుండా సామాన్య ప్రజలను ఇబ్బందులకు గురి చేయడం చాలా దారుణమన్నారు. సమ్మె వల్ల ప్రజలు తీవ్ర ఇబ్బందులు ఎదుర్కొంటున్నారని పండుగ సమయాల్లో వారిని ఇబ్బందులకు గురి చేయడం సరికాదన్నారు.

సమ్మెను విరమింపజేయడానికి అన్ని పార్టీలు జోక్యం చేసుకోవాలని ఆయన విజ్ఞప్తి చేశారు. రాష్ట్రంలోని అన్ని పార్టీలు చర్చించుకొని సమ్మె హింసాత్మకంగా మారక ముందే విరమింప జేసే ప్రయత్నాలు చేయాలన్నారు. సమ్మెలో హింసాత్మక సంఘటనలు చోటు చేసుకోవడం బాధాకరమన్నారు. ప్రభుత్వానికి ప్రధాన ఆదాయ వనరు ఎక్సైజ్ శాఖ అని మంత్రి మోపిదేవి వెంకటరమణ అన్నారు. ఈ శాఖ ఉద్యోగులు సమ్మెలోకి వెళ్లడంపై వారితో చర్చలు జరుపుతున్నామన్నారు. సమ్మె ప్రభావం లేకుండా తమ ప్రయత్నాలు తాము చేస్తున్నామన్నారు. తప్పని పరిస్థితులు ఏర్పడితే ప్రత్యామ్నాయ మార్గాలు వెతుకుతున్నట్లు చెప్పారు.

Published On October 5, 2011