ఢిల్లీలో తెలంగాణ వేడి: కావూరికి ఆజాద్ పిలుపు

న్యూఢిల్లీ/హైదరాబాద్: తెలంగాణతో ఢిల్లీ రాజకీయాలు వేడెక్కాయి. ఢిల్లీలో తెలంగాణ రాజగకీయాలు ముమ్మరంగా సాగుతున్నాయి. కేంద్ర మంత్రి ప్రణబ్ ముఖర్జీకార్యాలయంలో మినీ కోర్ కమిటీ సభ్యులు రాష్ట్రానికి చెందిన ముఖ్య నేతలతో సంప్రదింపులు జరుపుతోంది. శనివారం మధ్యాహ్నం వరకు పలువురు నేతలతో చర్చలు జరిపిన మినీ కోర్ కమిటీ సభ్యులు మధ్యాహ్నం నుంచి మళ్లీ చర్చలు ప్రారంభించారు. సమైక్యవాదాన్ని బలంగా వినిపిస్తున్న పార్లమెంటు సభ్యుడు కావూరి సాంబశివ రావును కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ ఢిల్లీకి ఆహ్వానించారు. ఆయనతో పాటు మరికొంత మంది నాయకులను కూడా ఆయన ఢిల్లీకి పిలిచారు. చిరంజీవిని కూడా గులాం నబీ ఆజాద్ మళ్లీ ఢిల్లీకి పిలిపించారు.

శనివారం ఉదయం పూట చర్చల్లో పాల్గొన్న డిప్యూటీ ముఖ్యమంత్రి దామోదర రాజనర్సింహ హైదరాబాదుకు తిరుగుముఖం పట్టారు. తనను చర్చలకు అధిష్టానం అహ్వానించలేదని సీమాంధ్రకు చెందిన రాష్ట్ర మంత్రి శైలజానాథ్ హైదరాబాదులో చెప్పారు. తమ తరఫున అధిష్టానంతో కావూరి మాట్లాడుతారని ఆయన మీడియా ప్రతినిధులతో చెప్పారు. తమ కాంగ్రెసు పార్టీ అధిష్టానం ప్రజాస్వామ్యబద్దంగా నిర్ణయం తీసుకుంటుందనే విశ్వాసం తమకు ఉందని ఆయన అన్నారు. సాధ్యమైనంత త్వరగా తెలంగాణ సమస్యను పరిష్కరించే దిశలో కాంగ్రెసు అధిష్టానం రాష్ట్రానికి చెందిన ముఖ్య నాయకులతో చర్చలు జరుపుతోంది.

English summary

As Delhi experience Telangana heat, AP Congress affairs incharge Ghulam Nabi Azad invited MP Kavuri Sambasiva Rao to Delhi.