సమ్మె సెగ మాకే ఎక్కువ, ఇక ఊరుకోం: ఐజి అనూరాధ

By Srinivas

Published: Tuesday, October 11, 2011, 13:03 [IST]

హైదరాబాద్: సకల జనుల సమ్మె సెగ అందరికంటే ఎక్కువగా తాకింది తమనేనని లా అండ్ ఆర్డర్ ఐజి అనూరాధ మంగళవారం అన్నారు. అనూరాధ మంగళవారం ప్రభుత్వ ప్రధాన కార్యదర్శిని కలిశారు. అనంతరం ఆమె మీడియాతో మాట్లాడారు. బలవంతంగా బందులు చేయిస్తుంటే, ఉద్యమం పేరుతో హింసాత్మక ఘటనలకు పూనుకుంటుంటే పోలీసులు ఉండి ఏం చేస్తున్నారని ప్రజలు తమను ప్రశ్నించే పరిస్థితి వచ్చిందన్నారు. ఇప్పటి వరకు తాము సంయమనంతో వ్యవహరించామని ఇప్పటి నుండి ప్రజలను ఇబ్బంది పెడితే సహించేది లేదని ఆందోళనకారులను హెచ్చరించారు.

ఆందోళనకారులపై కఠిన చర్యలు తీసుకోవాల్సిందిగా తమకు ప్రభుత్వం నుండి కూడా స్పష్టమైన ఆదేశాలు అందాయని చెప్పారు. హింసాత్మక చర్యలకు పూనుకుంటే ఇక నుండి సహించేది లేదన్నారు. సమ్మెతో నష్ట పోయేది సామాన్యులే అన్నారు. రైలు రోకో ఉన్నప్పటికీ గ్రూపు-2 పరీక్షలు నిర్వహిస్తామన్నారు. స్వచ్చంధంగా బందు అంటూనే విద్యాసంస్థలను బలవంతంగా ఎందుకు మూసి వేయిస్తున్నారని ప్రశ్నించారు. రైలు రోకో వాయిదా స్వాగతిస్తున్నామని అయితే 15, 16, 17 తేదీల్లో గ్రూపు పరీక్షలు ఉన్నందున విద్యార్థులకు ఇబ్బందులు లేకుండా చూడాలని కోరారు. ప్రయాణీకులకు పూర్తి భద్రత కల్పిస్తామన్నారు.

కాగా సకల జనుల సమ్మె, రైలు రోకో నేపథ్యంలో ముఖ్యమంత్రి కిరణ్ కుమార్ రెడ్డి డిజిపి దినేష్ రెడ్డి, ఇంటెలిజెన్స్ చీఫ్ మహేందర్ రెడ్డితో భైటీ అయ్యారు. సమస్యాత్మక ప్రాంతాలను గుర్తించి బలగాలు పెంచాలని ప్రజలకు ఎలాంటి ఇబ్బందులు కలగకుండా చర్యలు తీసుకోవాలని సిఎం సూచించినట్లుగా తెలుస్తోంది.

Published On October 11, 2011