తెలంగాణ సమ్మెపై 20 నుంచి తిరుగుబాటు: టిజి వెంకటేష్

కడప: తెలంగాణలో అక్టోబరు 20 నుంచి తిరుగుబాటు వస్తుందని చిన్ననీటి పారుదల శాఖ మంత్రి టీజీ వెంకటేశ్ అన్నారు. కడప జిల్లా ప్రొద్దుటూరులో ఆయన సోమవారం మీడియా ప్రతినిధులతో మాట్లాడారు. తెలంగాణలో జరుగుతున్న సకలజనుల సమ్మెపై రైతులు, పారిశ్రామికవేత్తలు, ఉద్యోగులు, విద్యార్థులు, వారి తల్లిదండ్రులు పూర్తిగా విసిగిపోయారని, తిరుగుబాటు చేసేందుకు వారంతా సిద్ధ్దంగా ఉన్నారని ఆయన అన్నారు. 20వతేదీ నుంచి కౌంట్‌డౌన్ ఆరంభమౌతుందని హెచ్చరించారు. రాజ్యాధికారం కోసమే కేసీఆర్ కుటుంబం ఇదంతా చేస్తోందని ఆయన విమర్శించారు.

కేసీఆర్ సీమాంధ్రకు ఒక రకంగా మేలు చేస్తున్నాడని ఆయన అన్నారు. తెలంగాణ పరిస్థితి చూసి ఎన్నారైలు, సీమాంధ్రులు, ఇతర పారిశ్రామికవేత్తలు ఎవరూ అక్కడ పెట్టుబడులు పెట్టడం లేదని, వారంతా సీమాంధ్రలో పెట్టుబడులు పెడుతుండటంతో ఇక్కడి భూముల ధరలు లక్షల్లో పలుకుతున్నాయని ఆయన అన్నారు. పరిశ్రమలన్నీ ఈ ప్రాంతాలకే వస్తున్నాయని ఆయన అన్నారు. కేసీఆర్ అలా చేయకపోతే మనవాళ్లంతా హైదరాబాదులోనే పెట్టుబడులు పెట్టేవారని, దాంతో హైదరాబాద్ మరింత అభివృద్ధి చెందేదని చెప్పారు. తెలంగాణ ఇస్తే దేశవ్యాప్తంగా ఎలాంటి ఉద్యమాలు రావని కేసీఆర్ హామీ ఇస్తే కేంద్రం ఒక్క సెకన్‌లోనే తెలంగాణ ఇచ్చేందుకు సిద్ధంగా ఉందని ఆయన అన్నారు.

English summary

Minister TG Venkatesh lashed out at TRS president K Chandrasekhar Rao.