ప్రశాంతంగా బాన్సువాడ ఉప ఎన్నికలు: 77.62 శాతం ఓటింగ్

By Srinivas

Published: Thursday, October 13, 2011, 19:01 [IST]

నిజామాబాద్: బాన్సువాడ ఉప ఎన్నికలు గురువారం ప్రశాంతంగా ముగిశాయి. బాన్సువాడ నియోజకవర్గంలోని 117 గ్రామాలలో 186 పోలింగ్ కేంద్రాలను ఏర్పాటు చేశారు. ఓటింగ్ కేంద్రాలు మొరాయించడం వంటి చిన్న చిన్న సమస్యలు తప్ప ఎన్నికలు ప్రశాంతంగా పూర్తయ్యాయి. నియోజకవర్గంలో 77.62 శాతం ఓట్లు పోలయ్యాయి. ఈవిఎంలను ఎస్ఆర్ఎస్‌కే కళాశాల స్ట్ర్రాంగ్ గదికి తరలించారు. ఓట్ల లెక్కింపు 17వ తారీఖున జరగనుంది. కాగా ఈ ఎన్నికల్లో తెలంగాణ రాష్ట్ర సమితి తరఫున పోటీ చేసిన పోచారం శ్రీనివాస్ రెడ్డి గెలుస్తాడనే వాదనలు బలంగా ఉన్న విషయం తెలిసిందే.

ఈ ఉప ఎన్నికల్లో ప్రధాన పార్టీలలో కాంగ్రెసు, తెరాసలు మాత్రమే పోటీ చేశాయి. తెలుగుదేశం పార్టీ పోటీకు దూరం జరిగింది. పోచారం శ్రీనివాస్ రెడ్డి గెలుస్తాడనే వాదనలు బలంగా ఉన్నప్పటికీ కాంగ్రెసు పార్టీ అభ్యర్థికి డిపాజిట్ దక్కుతుందా లేదా అనే ప్రశ్న అందరిలో ఉదయిస్తోంది. కాంగ్రెసు అభ్యర్థికి తెలంగాణ కాంగ్రెసు ప్రజా ప్రతినిధులు సైతం మద్దతు తెలపక పోవడం విశేషం. కాగా ఈ ఎన్నికల్లో కోయగుట్ట తండాకు చెందిన గ్రామస్తులు తాము తెలంగాణ వచ్చే వరకు ఎన్నికల్లో ఓటు వేసేది లేదని ఓటింగుకు దూరంగా ఉన్నట్లు తెలుస్తోంది.

Published On October 13, 2011