లక్ష్మీ పార్వతి అండతో విజయమ్మ పిల్: నన్నపనేని

By Srinivas

Published: Monday, October 17, 2011, 16:13 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తల్లి, పులివెందుల శాసనసభ్యురాలు వైయస్ విజయమ్మ తెలుగుదేశం పార్టీ అధినేత నారా చంద్రబాబు నాయుడు ఆస్తులపై రాష్ట్ర అత్యున్నత న్యాయస్థానం హైకోర్టును ఆశ్రయించడం వెనుక ఎన్టీఆర్ టిడిపి అధ్యక్షురాలు లక్ష్మీ పార్వతి హస్తం ఉండి ఉంటారని టిడిపి నేత నన్నపనేని రాజకుమారి సోమవారం అనుమానం వ్యక్తం చేశారు. బాబుపై దివంగత ముఖ్యమంత్రి వైయస్ రాజశేఖర రెడ్డి కూడా హైకోర్టును ఆశ్రయించారని అయితే వాటిని నిరూపించలేక కేసులు వెనక్కి తీసుకున్నారన్నారు. జగన్, వైయస్సార్ అక్రమ ఆస్తుల పైన సిబిఐ విచారణ జరుగుతున్నందునే వారు ఇలా చేసి ఉండవచ్చునన్నారు.

చంద్రబాబు ఆస్తులపై వైయస్ విజయమ్మ హైకోర్టు వెళ్లడాన్ని తాము తప్పు పట్టడం లేదన్నారు. కోర్టుకు వెళ్లే హక్కు అందరికీ ఉందన్నారు. అయితే జగన్ ఆస్తులపై సిబిఐ దర్యాఫ్తు జరుగుతున్న సమయంలో కేసు వేయడాన్ని కుట్రగా అభివర్ణించారు. జగన్ పైన జరుగుతున్న సిబిఐ దర్యాఫ్తు నుండి ప్రజల దృష్టిని మరల్చడానికి వారు కోర్టుకు వెళ్లారన్నారు. బాబు తప్పు చేశారని భావిస్తే దివంగత వైయస్ అధికారంలో ఉన్న ఐదున్నరేళ్లు ఏం చేశారని ఆయన విజయమ్మను ప్రశ్నించారు. వైయస్ అసమర్థుడు, దద్దమ్మ అని ఆమె ఇప్పుడు ఒప్పుకుంటారా అని ప్రశ్నించారు. గతంలో వైయస్ కూడా లక్ష్మీ పార్వతిని పట్టుకొని బాబు ఆస్తులపై పిటిషన్లు వేసి ఉపసంహరించుకున్నారో ఇప్పుడు అదే జరుగుతుందన్నారు. తాము ఇందుకు బయపడటం లేదన్నారు.

గతంలో వైయస్ బాబు ఆస్తులపై 32 పిటిషన్లు వేశారని వాటిని నిరూపించలేక వెవక్కి తీసుకున్నారని ఎమ్మెల్యేలు లింగారెడ్డి, పయ్యావుల కేశవ్ అన్నారు. చంద్రబాబు సచ్ఛీలురుగా బయట పడతారని చెప్పారు. బాబు అక్రమాలకు పాల్పడితే వైయస్ తన కేసులను ఉపసంహరించుకునే వారా అని ప్రశ్నించారు.

Published On October 17, 2011