ఇక కాంగ్రెసు టార్గెట్‌గా ఉద్యమం: తెలంగాణ జెఎసి

By Pratap

Published: Monday, October 17, 2011, 22:28 [IST]

హైదరాబాద్: ఇంత కాలం తెలుగుదేశం పార్టీని టార్గెట్ చేస్తూ వచ్చిన తెలంగాణ రాజకీయ జెఎసి ఇక కాంగ్రెసు పార్టీని టార్గెట్ చేసుకుని ఉద్యమాన్ని నడిపించాలని నిర్ణయించుకుంది. న్యూడెమొక్రసీ కార్యాలయంలో సోమవారం సాయంత్రం తెలంగాణ జెఎసి స్టీరింగ్ కమిటీ సమావేశం జరిగింది. కాంగ్రెసును లక్ష్యంగా చేసుకుని చేపట్టే ఉద్యమ కార్యక్రమాన్ని రెండు, మూడు రోజుల్లో ఖరారు చేస్తామని సమావేశానంతరం తెలంగాణ రాజకీయ జెఎసి చైర్మన్ కోదండరామ్ మీడియా ప్రతినిధులతో చెప్పారు. ఆంధ్రపాలకులకు తెలంగాణ కాంగ్రెసు నేతలు తొత్తులుగా మారారని ఆయన విమర్శించారు. తెలంగాణ వచ్చే వరకు సమ్మె కొనసాగుతుందని ఆయన చెప్పారు. కాంగ్రెసు పార్టీ ఆంధ్ర పాలకుల చేతిలో కీలుబొమ్మగా మారిందని ఆయన వ్యాఖ్యానించారు.

ఇక తెలంగాణ మంత్రులను లక్ష్యంగా చేసుకుని ఉద్యమం కొనసాగిస్తామని తెలంగాణ రాష్ట్ర సమితి (తెరాస) నాయకుడు నాయని నర్సింహారెడ్డి అన్నారు. తెలంగాణ రావాలంటే కాంగ్రెసు ఖతం కావాలని ఆయన అన్నారు. తెలంగాణ ఉద్యమకార్యకర్తలు గోవింద్, ప్రకాష్‌లను వేధిస్తున్నారని కోదండరామ్ ఆరోపించారు. సీమాంధ్ర పార్లమెంటు సభ్యులు కెవిపి రామచందర్ రావు, లగడపాటి రాజగోపాల్‌లతో తెలంగాణ మంత్రులు చర్చలు జరపడం సిగ్గు చేటు అని ఆయన అన్నారు. తెలంగాణ కోసం చేపట్టిన దీక్షను ఆరోగ్య కారణాల రీత్యా విరమించుకోవాలని జెఎసి సిపిఐ శాసనసభ్యుడు కూనంనేనికి విజ్ఞప్తి చేసింది. తెలంగాణ ఉద్యమకారులపై పెట్టిన కేసులను ఎత్తేయాలని జెఎసి ప్రభుత్వాన్ని డిమాండ్ చేసింది.

Published On October 17, 2011