జగన్‌పై మరోసారి దండెత్తిన కాంగ్రెసు నేత విహెచ్

By Pratap

Published: Monday, October 17, 2011, 14:10 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిపై కాంగ్రెసు సీనియర్ నేత వి. హనుమంతరావు మరోసారి దండెత్తారు. జగన్‌పై తీవ్ర వ్యాఖ్యలు చేశారు. వైయస్ రాజశేఖర రెడ్డి మరణించి రెండేళ్లు దాటిన తర్వాత కూడా వైయస్ జగన్ ఓదార్పు యాత్రను కొసాగిస్తుండడం విడ్డూరమని ఆయన సోమవారం మీడియా ప్రతినిధుల సమావేశంలో అన్నారు. వైయస్ జగన్ కాంగ్రెసు పార్టీని విమర్శిస్తుంటే పార్టీ నాయకులు ఎందుకు మౌనంగా ఉంటున్నారని ఆయన ప్రశ్నించారు. వైయస్ జగన్ సమావేశాలకు, వైయస్సార్ విగ్రహాల స్థాపనకు ఎలా అనుమతులు ఇస్తున్నారని ఆయన అడిగారు.

కాంగ్రెసు తెలంగాణ ఇస్తుందనే ప్రజలు నమ్మడం వల్లనే నిజామాబాద్ జిల్లా బాన్సువాడ ఉప ఎన్నికలో తమ పార్టీ అభ్యర్థి శ్రీనివాస్ గౌడ్‌కున డిపాజిట్ దక్కిందని ఆయన అన్నారు. తమ పార్టీ అధ్యక్షురాలు సోనియా గాంధీని, ప్రధాన మంత్రి మన్మోహన్ సింగ్‌ను తిడితే ప్రజలు సహించబోరని ఆయన అన్నారు. ముఖ్యమంత్రి కిరణ్ కుమార్ రెడ్డి కక్ష సాధింపు చర్యలకు పాల్పడుతున్నారని తాను అనుకోవడం లేదని ఆయన అన్నారు. కొంత మంది పోలీసుల అత్యుత్సాహం వల్లనే రైల్ రోకో సందర్భంగా పార్లమెంటు సభ్యుల అరెస్టు జరిగిందని ఆయన అన్నారు. రాజీనామాల వల్ల తెలంగాణ వస్తుందని తాను అనుకోవడం లేదని ఆయన అన్నారు.

Published On October 17, 2011