కాంగ్రెసు నుంచి బయటకు వస్తాం: కోమటిరెడ్డి వెంకటరెడ్డి

By Pratap

Published: Tuesday, October 18, 2011, 19:43 [IST]

హైదరాబాద్: తెలంగాణ ఇవ్వకపోతే కాంగ్రెసు పార్టీ నుంచి బయటకు రావాలని నాయకులు భావిస్తున్నారని, పార్టీ నుంచి బయటకు వచ్చే అవకాశాలను పరిశీలిస్తున్నామని మాజీ మంత్రి కోమటిరెడ్డి వెంకటరెడ్డి చెప్పారు. కాంగ్రెసు స్టీరింగ్ కమిటీ సమావేశానంతరం ఆయన సోమవారం సాయంత్రం మీడియా ప్రతినిధులతో మాట్లాడారు. తెలంగాణను ఇచ్చేది కాంగ్రెసు పార్టీయే కాబట్టి తెలంగాణ రాష్ట్ర సమితి (తెరాస) నాయకులే కాంగ్రెసులోకి వస్తారని ఆయన వ్యాఖ్యానించారు. తెలంగాణ రాష్ట్ర సాధన లక్ష్యమని, తెలంగాణ కోసం పార్టీలతో సంబంధం లేకుండా కార్యక్రమాల్లో పాల్గొంటామని ఆయన చెప్పారు. తెలంగాణ సాధన కోసం అన్ని పార్టీలతో కలిపి ఓ ఐక్య వేదికను ఏర్పాటు చేస్తామని ఆయన అన్నారు.

తెలంగాణ సాధన కోసం తమ స్టీరింగ్ కమిటీ కఠిన నిర్ణయాలు తీసుకుంటుందని ఆయన చెప్పారు. తెలంగాణపై మంత్రి జానారెడ్డి సీరియస్‌గా ఉన్నారని, తనకు పదవి ముఖ్యం కాదని సమావేశంలో చెప్పారని ఆయన అన్నారు. తెలంగాణ కోసం తెలంగాణకు చెందిన మంత్రులు రాజీనామా చేయాలని సమావేశంలో పట్టుబట్టినట్లు ఆయన తెలిపారు. తెలంగాణవాదాన్ని అందరూ గట్టిగా వినిపించాల్సిందేనని ఆయన అన్నారు. నవంబర్ 1వ తేదీన రాష్ట్రావతరణ దినోత్సవాలను బహిష్కరిస్తామని ఆయన చెప్పారు.

Published On October 18, 2011