జగన్‌ను వదిలేది లేదు, తెలంగాణ అధిష్టానానిదే: ఆనం

By Srinivas

Published: Sunday, October 23, 2011, 14:31 [IST]

హైదరాబాద్: అక్రమాలకు ఆధారాలు ఉంటే వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి సహా ఎవ్వరినీ వదిలేది లేదని శ్రీ పొట్టి శ్రీరాములు నెల్లూరు జిల్లా కాంగ్రెసు సీనియర్ శాసనసభ్యుడు ఆనం వివేకానంద రెడ్డి ఆదివారం అన్నారు. హెలికాప్టర్ దిగే విధంగా ఇల్లు కట్టుకున్న వారికి పేదరికం గురించే ఏం తెలుస్తుందని ఆయన ప్రశ్నించారు. ఒక ఇంట్లో 82 గదులు ఉంటే దానిని ఇల్లు అంటారా అని అది లోటస్ హోటల్ అన్నారు. పదవులు రాలేదని రాజీనామా చేసి ఊళ్ల మీద తిరిగితే ప్రజలు అసహ్యించుకుంటారన్నారు. ప్రజా వ్యతిరేకత వల్లే సకల జనుల సమ్మె ఆగిపోయిందని అన్నారు.

పోలవరం ప్రాజెక్టు టెండర్లు ఇంకా పూర్తి కాలేదని ఈ విషయంలో నిందలు వేయడం సరికాదన్నారు. ప్రస్తుతం జరుగుతున్న ఉద్యమాలన్నీ రాజకీయ ఉద్యమాలే అని విమర్శించారు. తెలంగాణ అంశంపై కేంద్రం నిర్ణయానికే కట్టుబడి ఉంటామన్నారు. చిన్న నీటి పారుదల శాఖ మంత్రి టిజి వెంకటేష్ ప్రత్యేక అజెండాతో వెళుతున్నారన్నారు. తాము మాత్రం అధిష్టానం నిర్ణయానికి కట్టుబడి ఉంటామని చెప్పారు.

Published On October 23, 2011