'చిరంజీవి'కి ఈసారి దక్కేనా? రేసులో డి శ్రీనివాస్, కంతేటి

By Srinivas

Published: Sunday, October 23, 2011, 17:55 [IST]

హైదరాబాద్: తిరుపతి శాసనసభ్యుడు చిరంజీవిని కాంగ్రెసు పార్టీ అధిష్టానం కరుణించే అవకాశాలు కనిపించడం లేదు. తమిళనాడు గవర్నర్‌గా వెళ్లిన మాజీ ముఖ్యమంత్రి కొణిజేటి రోశయ్య ఖాళీ చేసిన శాసనమండలి స్థానాన్ని చిరంజీవి వర్గానికి ఇచ్చేట్లుగా కనిపించడం లేదు. చిరంజీవి తన పార్టీని విలీనం చేసి నెలలు గడుస్తున్నా ఆయన వర్గానికి కాంగ్రెసు పార్టీ నుండి ఒక ఎమ్మెల్సీ పదవి మించి ఇప్పటి వరకు దక్కిందేమీ లేదనే చెప్పవచ్చు. ముఖ్యమంత్రి కిరణ్ కుమార్ రెడ్డి మంత్రివర్గంలో మార్పులు చేర్పులు జరిగితే మాజీ పిఆర్పీ ఎమ్మెల్యేల్లో ఇద్దరికి మంత్రివర్గంలో చోటు దక్కవచ్చు. అయితే సకల జనుల సమ్మె, వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి సమస్యల నేపథ్యంలో ఎప్పటికప్పుడు మంత్రివర్గ మార్పులు చేర్పులను వాయిదా వేస్తూ వస్తున్నారు.

సిఎం కిరణ్ ఢిల్లీ వెళ్లినప్పుడల్లా మంత్రివర్గ విస్తరణ గురించి అధిష్టానాన్ని అడుగుతున్నప్పటికీ పరిస్థితుల దృష్ట్యా ససేమీరా అంటున్నారు. సిఎం సైతం మంత్రివర్గంలో మార్పుల ద్వారా తనకు అనుకూలమైన వారిని తీసుకుందామనే భావనలో ఉన్నారు. కానీ అధిష్టానం నుండి అనుమతి రావడం లేదు. దీంతో ఎన్నాళ్ల నుండో నిరీక్షిస్తున్న చిరు వర్గం నేతలకు అవకాశం రావడం లేదు. ఇక చిరంజీవికి కూడా ఏఐసిసిలో చోటు దక్కుతుందని, కేంద్ర మంత్రివర్గంలోకి తీసుకుంటారనే ఊహాగానాలు అప్పట్లో వినిపించాయి. కానీ చిరంజీవికి ఏదీ దక్కలేదు. దీంతో చిరంజీవి వర్గంలో అనాసక్తత ఏర్పడింది. అయితే రోశయ్య స్థానం ఖాళీ కావడంతో మళ్లీ పలువురు ముఖ్యనేతలు ఆశలు పెట్టుకున్నారు. ఇటీవల ఓ నేత పిసిసి చీఫ్ బొత్సను కలిసి తనకు ఆ స్థానం కేటాయించాలని కూడా కోరారు. కానీ వారి ఆశలు నెరవేరేలా కనిపించడం లేదు. ఇటీవల బొత్స చిరును కలిసి ఎమ్మెల్సీ స్థానంపై చర్చించిన విషయం తెలిసిందే.

కాగా ఎమ్మెల్సీ స్థానం కోసం మాజీ పిసిసి చీఫ్ బొత్స సత్యనారాయణ, పిసిసి క్రమశిక్షణా సంఘం చైర్మన్ కంతేటి సత్యనారాయణ పేర్లు ప్రధానంగా వినిపిస్తున్నాయి. తెలంగాణ ఉద్యమం నేపథ్యంలో డిఎస్‌కు ఇవ్వాలని అధిష్టానం నిర్ణయించుకున్నట్లుగా తెలుస్తోంది. రోశయ్య ఆంధ్రా ప్రాంతం వ్యక్తి కాబట్టి ఆంధ్రా ప్రాంతం వారికి ఇవ్వాలని, వైశ్య నేత కాబట్టి ఆ వర్గానికే ఇవ్వాలనే విజ్ఞప్తులు వచ్చినప్పటికీ అవన్నీ తోసిరాజనే డిఎస్ లేదా కంతేటికి కేటాయించే అవకాశాలు కనిపిస్తున్నాయి.

Published On October 23, 2011