జైల్లో మధు కొడాను కొట్టిన అధికారులు, విరిగిన చేయి

By Pratap

Published: Monday, October 31, 2011, 16:34 [IST]

రాంచీ: శరీరంపై గాయాలతో జార్ఖండ్ మాజీ ముఖ్యమంత్రి మధు కొడాను ఆస్పత్రిలో చేర్చారు. రాంచీలోని బిర్సా ముండా జైలులో మధు కొడాను అధికారులు కొట్టినట్లు తెలుస్తోంది. దీంతో ఆయన గాయపడినట్లు చెబుతున్నారు. మధుకొడా చేయి విరిగినట్లు కూడా వార్తలు వస్తున్నాయి. ఖైదీలకు సరైన ఆహారం పెట్టనందుకు నిరసనగా తాను సోమవారం ఉదయం నుంచి తాను నిరాహార దీక్ష చేపట్టానని, దాంతో జైలు అధికారులు కొడాతో వాదనకు దిగారని అంటున్నారు. తనపై జైలు అధికారులు దారుణంగా దాడి చేశారని మధు కొడా అంటున్నారు.

జైలులో గుమిగూడిన ఖైదీలను చెదరగొట్టడానికి బాటోన్స్‌ను ప్రయోగించామని, ఇందులో మధు కొడా గాయపడ్డారని జైలు అధికారులు చెబుతున్నారు. కొడాను సందర్శించడానికి వచ్చిన వారు కూడా అధికారుల దెబ్బలకు గాయపడినట్లు సమాచారం. సందర్శకులపై పరిమితి విధించినట్లు, అయితే మధు కొడా తన వద్దకు ఎక్కువ మంది సందర్శకులను అనుమతించాలని అడిగినట్లు, జైలు అధికారులు నిరాకరించడంతో కొడా, ఆయన అనుచరులు ప్రజలను కలవడానికి జనరల్ వార్డుకు వెళ్లారని చెబుతున్నారు.

జనరల్ వార్డు ఖైదీలతో మధుకోడా, ఆయన అనుచరులు కలిసిపోయారని, ఈ స్థితిలో ఖైదీలను చెదరగొట్టడానికి బటోన్స్ ప్రయోగించారని, ఇందులో కొడా గాయపడ్డారని అంటున్నారు. మధు కొడాను రాంచీ వైద్య విజ్ఞాన సంస్థ (రిమ్స్ల్)లో చేర్చారు. నాలుగు వేల కోట్ల రూపాయల మనీ లాండరింగ్ కేసులో మధు కొడా 2009 నవంబర్ నుంచి జైలులో ఉన్నారు.

Published On October 31, 2011