సమైక్యాంధ్ర వైఖరిని బయటపెట్టుకున్న చంద్రబాబు

By Pratap

Published: Tuesday, November 1, 2011, 11:39 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు, తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు వ్యతిరేకంగా తెలుగుదేశం పార్టీ అధ్యక్షుడు నారా చంద్రబాబు నాయుడు వ్యాఖ్యలు చేశారు. వైయస్ జగన్ ఓదార్పునకు అంతు లేదని ఆయన వ్యాఖ్యానించారు. వలసలను ప్రోత్సహించడం తప్ప తెరాస చేసిందేమీ లేదని ఆయన అన్నారు. ఆంధ్రప్రదేశ్ అవతరణ దినోత్సవం సందర్భంగా ఆయన మంగళవారం తెలుగుతల్లి విగ్రహానికి పూలమాల వేసి అంజలి ఘటించారు. అనంతరం ఆయన పార్టీ కార్యాలయంలో ప్రసంగించారు. అవినీతి సొమ్మును దోచుకోవడానికి పార్టీలన్నీ ఏకమవుతున్నాయని ఆయన విమర్శించారు. రాష్ట్రాన్ని కలిపి ఉంచడం కోసం బూర్గుల రామకృష్ణారావు పదవీ త్యాగం చేశారని ఆయన అన్నారు. తెలుగుజాతిది మూడు వేల సంవత్సరాల చరిత్ర అని, 150 సంవత్సరాలు మాత్రమే తెలుగువాళ్లు విడిపోయి ఉన్నారని ఆయన అన్నారు. రాష్ట్ర విభజనకు వ్యతిరేకంగా ఆయన ఆ పరోక్ష వ్యాఖ్య చేశారు. ఆ రకంగా చంద్రబాబు తన సమైక్యాంధ్ర వైఖరిని వెల్లడించారు.

రూపాయికి కిలో బియ్యం పథకం వల్ల ప్రయోజనం లేదని, నిత్యావసర సరుగుల ధరలు తగ్గిస్తే ప్రజలకు ఉపయోగకరంగా ఉంటుందని ఆయన అన్నారు. ఏదో ఒక పథకం ప్రారంభించాలి కాబట్టే రూపాయికి కిలోబియ్యం పథకాన్ని ముఖ్యమంత్రి ప్రవేశపెట్టారని ఆయన అన్నారు. దానివల్ల పేదలకు ఒరిగేదేమీ లేదని ఆయన అన్నారు.తమ పార్టీ ప్రభుత్వ హయాంలోనే రాష్ట్రాభివృద్ధి జరిగిందని ఆయన అన్నారు. రాష్ట్రంలో మార్పు తెచ్చామని ఆయన అన్నారు. పలు సంక్షేమ, అభివృద్ధి కార్యక్రమాలు చేపట్టామని ఆయన చెప్పారు. ముఖ్యమంత్రులను మార్చడం, అభివృద్ధిని విస్మరించడం కాంగ్రెసుకు ఆనవాయితీగా మారిందని ఆయన అన్నారు. ఇప్పటికే ముగ్గురు ముఖ్యమంత్రులను మార్చారని ఆయన అన్నారు. రాష్ట్రంలోని 700 మండలాల్లో కరువు నెలకొందని, కరువు సహాయ చర్యల్లో ప్రభుత్వం కాలయాపన చేస్తోందని ఆయన అన్నారు. పోలవరం టెండర్లలో రికార్డులను తారుమారు చేశారని చంద్రబాబు విమర్శించారు.

Published On November 1, 2011