జగన్ కేసు, సిబిఐ ముందు విజయసాయి రెడ్డి

By Pratap

Published: Wednesday, November 2, 2011, 19:04 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఆస్తుల కేసులో జగతి పబ్లికేషన్స్ సంస్థ వైస్ చైర్మన్ విజయసాయి రెడ్డి బుధవారం సిబిఐ ముందు హాజరయ్యారు. తమ కార్యాలయానికి పిలిపించి సిబిఐ అధికారులు విజయసాయి రెడ్డిని ప్రశ్నించారు. విజయసాయి రెడ్డి గత రెండు రోజులుగా హైదరాబాదులోని కోఠీలో గల సిబిఐ కార్యాలయానికి వచ్చి అధికారులు అడిగిన వివరాలు అందిస్తున్నారు.

వైయస్ జగన్ ఆస్తుల కేసులో సిబిఐ ఇప్పటికే 90 శాతం దర్యాప్తును పూర్తి చేసినట్లు చెబుతున్నారు. తమ వద్ద ఉన్న ఆధారాలను నిందితుల వాంగ్మూలాలతో సిబిఐ అధికారులు సరిపోల్చి చూస్తున్నట్లు తెలుస్తోంది. కర్ణాటక మాజీ మంత్రి గాలి జనార్దన్ రెడ్డికి చెందిన ఓబుళాపురం మైనింగ్ కంపెనీతో జగన్‌కు ఉన్న సంబంధాలపై కూడా సిబిఐ అధికారులు విజయసాయి రెడ్డిని అడిగి వివరాలు రాబట్టినట్లు వార్తలు వస్తున్నాయి. గాలి జనార్దన్ రెడ్డి కేసులో సిబిఐ తమ ముందు ఈ నెల 4వ తేదీన హాజరు కావాలని వైయస్ జగన్‌కు నోటీసులు జారీ చేసిన విషయం తెలిసిందే.

Published On November 2, 2011