ఉన్నన్ని రోజులు తండ్రిని పీడించాడు: జగన్‌పై నామా

By Srinivas

Published: Friday, November 4, 2011, 8:59 [IST]

న్యూఢిల్లీ: అధికారం కోసం తండ్రి బతికున్నంత కాలం ఆయనను పీడించిన వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఇప్పుడు అదే అధికారం కోసం అమాయకురాలైన తల్లిని ఉపయోగించుకుంటున్నాడని ఖమ్మం పార్లమెంటు సభ్యుడు నామా నాగేశ్వర రావు గురువారం సాయంత్రం విమర్శించారు. నీకు అన్ని ఆస్తులు ఎక్కడి నుండి వచ్చాయో చెప్పగలవా అని సవాల్ విసిరారు. తాను ముప్పయ్యేళ్లు కష్టపడి ఇంత సంపాదించానని, నువ్వు మూడేళ్లలోనే రూ.లక్ష కోట్ల ప్రజాధనాన్ని దోచుకున్నావని ధ్వజమెత్తారు. నాకు నీకు పోలికా అని ప్రశ్నించారు. అవినీతి సొమ్ముతో పేపర్, ఛానల్ పెట్టావని, అందరూ నీలాగే అవినీతికి చేస్తారనుకుంటే ఎలా అన్నారు. నీవు, నేను ఇద్దరం ఎంపీలమే పార్లమెంటులో మన ఇద్దరి ఆస్తులపై చర్చకు సిద్ధమా అని సవాల్ విసిరారు. తన ఆస్తుల వివరాలు పూర్తిగా ఇస్తానని అలాగే నీకు ఆస్తులు ఎలా వచ్చాయో చెప్పగలవా అని ప్రశ్నించారు.

ప్రజల ధనాన్ని దోచుకున్న జగన్ త్వరలో జైలుకెళ్లడం ఖాయమన్నారు. తన గురించి, తన కంపెనీల గురించి జగన్ మీడియాలో తప్పుడు వార్తలు రాస్తున్నారని, ఇంగ్లీషు మీడియాకు చెందిన ఒక రెడ్‌లైట్ పత్రికను ఆధారంగా చేసుకుని జగన్‌కు చెందిన అవినీతి పేపర్ అవాస్తవాలు రాస్తోందని విమర్శించారు. కర్నాటక మాజీ మంత్రి గాలి జనార్దనరెడ్డికి చెందిన ఓఎంసి నుంచి అక్రమంగా పొందిన డబ్బుతోనే జగన్ పత్రిక, చానెల్ ప్రారంభించారన్నారు. అవినీతిని కూడా స్టాంపు పత్రాలపై రిజిస్టర్ చేసిన ఘనత జగన్‌దే అన్నారు. ప్రభుత్వం తీరుపై కూడా ఆయన తీవ్రంగా విరుచుకు పడ్డారు.

Published On November 4, 2011