సొంత ఇళ్లకు 60 రోజుల తర్వాత ఆ ఇద్దరు మంత్రులు

వరంగల్: తెలంగాణ వేడి కాస్తా తగ్గుముఖం పట్టినట్లు కనిపించడంతో వరంగల్ జిల్లాకు చెందిన ఇద్దరు రాష్ట్ర మంత్రులు తమ సొంత నియోజకవర్గాల్లో అడుగు పెట్టబోతున్నారు. దాదాపు 60 రోజుల తర్వాత మంత్రులు పొన్నాల లక్ష్మయ్య, బస్వరాజు సారయ్య వస్తున్నారు. ఈ నెల 14వ తేదీన తమ తమ నియోజకవర్గాల్లో రచ్చబండ కార్యక్రమాన్ని వారు ప్రారంభిస్తారు. రాష్ట్రవ్యాప్తంగా ఈ నెల 2వ తేదీన రచ్చబండ కార్యక్రమం ప్రారంభమైనప్పటికీ వరంగల్ జిల్లాలో తెలంగాణ వేడి వల్ల ఇప్పటి వరకు మొదలు కాలేదు. జిల్లాలకు వచ్చినప్పుడల్లా మంత్రులను తెలంగాణవాదులు చుట్టుముట్టడం, ఘెరావ్ చేయడం జరుగుతోంది. దీంతో వారిద్దరు నియోజకవర్గాలకు దూరమయ్యారు.

పొన్నాల లక్ష్మయ్య జనగాం నియోజకవర్గంలో, సారయ్య వరంగల్ తూర్పు నియోజకవర్గంలో రచ్చబండ కార్యక్రమాన్ని ఈ నెల 14వ తేదీన ప్రారంభించడానికి అవసరమైన ఏర్పాట్లను అధికారులు చేస్తున్నారు. తెలంగాణవాదుల నుంచి తీవ్రమైన ప్రతిఘటన ఎదురవుతుందనే భయంతో అధికారులు ఇప్పటి వరకు జిల్లాలో రచ్చబండను ప్రారంభించలేదు. నిరుడు కూడా వరంగల్ జిల్లాలో రచ్చబండ కార్యక్రమం విఫలమైంది. రచ్చబండ కోసం రాయినిగూడెం వచ్చిన ముఖ్యమంత్రి కిరణ్ కుమార్ రెడ్డిపై మహిళలు ప్రతిఘటించారు. దీంతో ఆయన ఏమీ మాట్లాడకుండానే వెళ్లిపోయారు.

English summary

Two Ministers, Ponnala Laxmaiah and Baswaraju Saraiah, would be coming down to their native Warangal district after 60 days, for the launch of Rachabanda program in the third week of November.