జగన్ కేసులో ఐఎఎస్ అధికారి భానుకు సిబిఐ నోటీసు

హైదరాబాద్: మూడు కీలకమైన కేసుల్లో సిబిఐ ఐఎఎస్ అధికారి భానుకు నోటీసు జారీ చేసింది. ఎల్లుండి తమ ముందు హాజరు కావాలని ఆదేశించింది. వైయస్ జగన్ ఆస్తులు, గాలి జనార్దన్ రెడ్డి గనుల అక్రమ తవ్వకం, ఎమ్మార్ ప్రాపర్టీస్ అక్రమాల కేసుల్లో సిబిఐ ఆయనకు నోటీసులు జారీ చేసింది. అసోం క్యాడర్‌కు చెందిన ఐఎఎస్ అధికారి వైయస్ రాజశేఖర రెడ్డి హయాంలో ప్రభుత్వంలో కీలకమైన బాధ్యతలు నిర్వహించారు. ముఖ్యమంత్రిగా ఉన్నప్పుడు వైయస్ రాజశేఖర రెడ్డికి ఆయన వ్యక్తిగత కార్యదర్శిగా పనిచేశారు. ప్రస్తుతం ఆయన ఢిల్లీలోని అసోం భవన్‌లో రెసిడెంట్ కమిషనర్‌గా బాధ్యతలు నిర్వహిస్తున్నారు. ప్రభుత్వ నిర్ణయాల్లో ముఖ్యమంత్రి కార్యాలయంలో కీలక బాధ్యతలు నిర్వహించిన భానుకు సంబంధం ఉంటుంది కాబట్టి సిబిఐ నోటీసులు జారీ చేసినట్లు చెబుతున్నారు.

కాగా, గాలి జనార్దన్ రెడ్డి కేసులో ఐఎఎస్ అధికారి రాజగోపాల్‌ను అరెస్టు చేసిన సిబిఐ మరో ఐఎఎస్ అధికారి శ్రీలక్ష్మిని అరెస్టు చేసేందుకు రంగం సిద్ధం చేసినట్లు చెబుతున్నారు. అయితే, ఆమె చెన్నైలోని తన సోదరి ఇంట్లో ఉన్నట్లు చెబుతున్నారు. తనకు ఆరోగ్యం బాగా లేదని ఆమె తెలిపినట్లు చెబుతున్నారు. ఈ నెల 29వ తేదీ వరకు ఆమె సెలవు పెట్టినట్లు తెలుస్తోంది. కుటుంబ సంక్షేమ శాఖలో పనిచేస్తున్న ఆమె బాధ్యతలను రాష్ట్ర ప్రభుత్వం మరో ఐఎఎస్ అధికారికి అప్పగించింది.

ఇదిలా ఉంటే, గనుల అక్రమ తవ్వకాల కేసులో నిందితులు గాలి జనార్దన్ రెడ్డి, ఓబుళాపురం మైనింగ్ కంపెనీ మేనేజింగ్ డైరెక్టర్ బివి శ్రీనివాస రెడ్డి బెయిల్ పిటిషన్లపై కోర్టులో మంగళవారం వాదనలు ముగిశాయి. బెయిల్ పిటిషన్లపై నిర్ణయాన్ని కోర్టు ఎల్లుండికి వాయిదా వేసింది. బెయిల్ పిటిషన్లపై మంగళవారం సుదీర్ఘంగా వాదనలు జరిగాయి.

English summary

IAS officer Bhanu was summoned by CBI in the cases of YS Jagan assets, Gali Janardhan Reddy's illegal mining and Emaar properties.