మంత్రి ముఖేష్ పిఎపై హెచ్ఆర్‌సికి యువతి ఫిర్యాదు

By Pratap

Published: Thursday, November 17, 2011, 12:00 [IST]

హైదరాబాద్: మంత్రి ముఖేష్ గౌడ్ వ్యక్తిగత సహాయకుడు అరుణ్ కుమార్‌పై పాతికేళ్ల యువతి భవానీ రాష్ట్ర మానవ హక్కుల కమిషన్ (హెచ్‌ఆర్‌సి)కి ఫిర్యాదు చేసింది. అరుణ్ కుమార్‌తో పాటు రియల్టర్ అశోక్, రాయదుర్గం ఇన్‌స్పెక్టర్ రవీందర్ రెడ్డి తనను వేధిస్తున్నారని ఆమె ఆరోపించింది. ఆ యువతి ఫిర్యాదు ప్రకారం - ఉద్యోగం కోసం భవానీ జనవరిలో ముఖేష్ గౌడ్‌ను కలవడానికి అరుణ్ కుమార్‌ను సంప్రదించింది. లక్ష రూపాయలు, పాస్‌పోర్టు సైజు ఫొటో, సర్టిఫికెట్ల కాపీలు ఇవ్వాలని అరుణ్ కుమార్ ఆమెను అడిగాడు.

ఉద్యోగం రావడానికి బదులు అశోక్ నుంచి తనకు ఎస్ఎంఎస్‌లు రావడం ప్రారంభమైందని భవానీ చెప్పింది. ఇంతలో భవానీకి ఓ టీవీ చానెల్‌లో ఉద్యోగం వచ్చింది. దీంతో తన డబ్బులు తిరిగి ఇవ్వాలని భావనీ అరుణ్ కుమార్‌ను అడిగింది. దాంతో రవీందర్ రెడ్డి సహాయంతో అరుణ్ కుమార్, అశోక్ తనను బెదిరించారని ఆమె ఆరోపించింది. దీనిపై డిసెంబర్ 2వ తేదీలోగా నివేదిక సమర్పించాలని కమిషన్ యాక్టింగ్ చైర్మన్ కె. పెద పేరి రెడ్డి సైబరాబాద్ పోలీసు కమిషనర్‌ను అదేశించారు.

Published On November 17, 2011