కిరణ్ ప్రభుత్వం రావాలంటేనే భయపడుతోంది: జగన్

గుంటూరు: కిరణ్ కుమార్ రెడ్డి ప్రభుత్వం పల్లెల్లోకి రావాలంటే భయపడుతోందని అందుకే మండల కేంద్రాల్లో రచ్చబండ కార్యక్రమాన్ని నిర్వహిస్తోందని వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి మంగళవారం గుంటూరు జిల్లాలోని తన ఓదార్పు యాత్రలో విమర్శించారు. దివంగత ముఖ్యమంత్రి రాజశేఖర రెడ్డి రచ్చబండ ద్వారా పల్లె ప్రజల్లో అర్హులందరికీ పథకాలు ఆందాలని కలలు కంటే ఈ ప్రభుత్వం అందుకు విరుద్దంగా వెళుతోందన్నారు. పల్లె ప్రజల కోసం ఏర్పాటు చేసిన రచ్చబండ మండల కేంద్రాల్లో ఏర్పాటు చేయడాన్ని ఆయన తప్పుపట్టారు.

వైయస్ పాలనలో అర్హులైన వారందరికీ ఇళ్లను మంజూరు చేశారన్నారు. ప్రస్తుతం ఎమ్మెల్యేలు సిఫారసు చేసిన వ్యక్తులకే ప్రభుత్వం ఇళ్లను మంజూరు చేస్తామని చెప్పడం సిగ్గు చేటన్నారు. రాష్ట్రంలో నిత్యావసర వస్తువుల ధరలు పెరిగి ప్రజలు విలవిల్లాడుతున్నారన్నారు. వరి ధాన్యానికి మద్దతు ధర లేక రైతులు రాష్ట్ర చరిత్రలో ఎప్పుడు లేని విధంగా పంట విరామం ప్రకటిస్తున్నారన్నారు. వైయస్ తర్వాత ఏ ఒక్క నాయకుడూ పేదలకు మేలు చేయాలనే ఆలోచన చేయలేదన్నారు.

English summary

Kiran Kumar Reddy government afraid of people to come villages, accused YSR Congress Party president YS Jaganmohan Reddy today in his Guntur Odarpu Yatra.