గాలి కేసు: మరో ఐఏఎస్ అధికారిని విచారించిన సిబిఐ

By Srinivas

Published: Wednesday, November 23, 2011, 11:58 [IST]

హైదరాబాద్: కర్నాటక మాజీ మంత్రి గాలి జనార్ధన్ రెడ్డి ఓబుళాపురం మైనింగ్ కేసులో సిబిఐ అధికారులు మరో మాజీ ఐఏఎస్ అధికారిని బుధవారం విచారించారు. దివంగత ముఖ్యమంత్రి వైయస్ రాజశేఖర రెడ్డి హయాంలో ముఖ్యమంత్రి కార్యాలయంలో గనుల శాఖ బాధ్యతలు నిర్వర్తించిన మాజీ ఐఏఎస్ ప్రభాకర్ రెడ్డిని సిబిఐ విచారించింది. గాలి జనార్ధన్ రెడ్డికి గనుల కేటాయింపులపై పలు వివరాలు వారు ఆయన నుండి రాబట్టినట్లుగా తెలుస్తోంది. ప్రభాకర్ రెడ్డిని మరోసారి కూడా విచారించే అవకాశముంది.

గాలి కేసులో సిబిఐ అధికారులు శ్రీలక్ష్మి, రాజగోపాల్, భానును విచారించిన విషయం తెలిసిందే. ప్రభాకర్ రెడ్డి తర్వాత అప్పుడు పని చేసిన మరికొందరు అధికారులను కూడా విచారించే అవకాశముందని తెలుస్తోంది. మరోవైపు వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి ఆస్తుల కేసు విషయంలో కడప జిల్లా డిఆర్వో హేమసాగర్ సిబిఐ ముందు హాజరయ్యారు.

Published On November 23, 2011