కళ్లు మూసుకుని విజయమ్మ సంతకం పెట్టారు: సోమిరెడ్డి

హైదరాబాద్: తమ పార్టీ అధ్యక్షుడు నారా చంద్రబాబు నాయుడు వేసిన పిటిషన్‌పై వైయస్సార్ కాంగ్రెసు పార్టీ గౌరవాధ్యక్షురాలు వైయస్ విజయమ్మ కళ్లు మూసుకుని సంతకం చేశారని తెలుగుదేశం పార్టీ నాయకుడు సోమిరెడ్డి చంద్రమోహన్ రెడ్డి ఆరోపించారు. చంద్రబాబుపై వైయస్ విజయమ్మ వేసిన పిటిషన్‌లో చేసిన ఆరోపణలపై ఆయన శనివారం మీడియా ప్రతినిధుల సమావేశంలో తీవ్రంగా ధ్వజమెత్తారు. కుమారుడు వైయస్ జగన్ చేతిలో విజయమ్మ కీలుబొమ్మగా మారారని, ఎక్కడ సంతకం పెట్టాలంటే అక్కడ పెట్టారని ఆయన అన్నారు. బాధ్యతాయుతమైన శాసనసభ్యురాలిగా ఉండి వైయస్ విజయమ్మ అలా చేయడం సరి కాదని ఆయన అన్నారు.

భర్త వైయస్ రాజశేఖర రెడ్డి, కుమారుడు వైయస్ జగన్ పీకల లోతు అవినీతి ఆరోపణల్లో కూరుకుపోయి సాక్ష్యాలతో కూడా దొరికిపోయిన స్థితిలో దాని నుంచి దృష్టి మళ్లించడానికే వైయస్ విజయమ్మ చంద్రబాబుపై పిటిషన్ వేశారని ఆయన అన్నారు. కెజి బేసిన్‌ విషయంలో చంద్రబాబు హయాంలో ముఖేష్ అంబానీకి మేలు చేశారనే ఆరోపణను ఆయన ఖండించారు. వైయస్ జగన్ ముఖేష్ అంబానీ వద్దకు వెళ్లి బ్లాక్ మెయిల్ చేయాలని అనుకున్నాడని, ముఖేష్ అంబానీ జగన్‌ను కలుసుకోకుండా ప్రత్యేక విమానంలో ఢిల్లీ వెళ్లి కాంగ్రెసు అధ్యక్షురాలు సోనియాను కలిశారని, అప్పుడు సోనియా వైయస్ రాజశేఖర రెడ్డిని చీవాట్లు పెట్టారని సోమిరెడ్డి చంద్రమోహన్ రెడ్డి వివరిస్తూ ఆ విషయాలు నిజం కావా అని ప్రశ్నించారు.

English summary

TDP leader Somireddy Chandramohan Reddy lshed out YSR Congress MLA YS Vijayamma.