జయసుధ, శేషారెడ్డిలనే తీసుకెళ్లగలిగారు: అంబటి

By Srinivas

Published: Sunday, November 27, 2011, 12:22 [IST]

హైదరాబాద్: ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, రాష్ట్ర వ్యవహారాల ఇంచార్జ్ గులాం నబీ ఆజాద్ ఎంతగా ప్రయత్నాలు చేసినప్పటికీ తమ పార్టీ అధినేత వైయస్ జగన్‌కు అనుకూలంగా ఉన్న వారిలో ఇద్దరు ఎమ్మెల్యేలను మాత్రమే తిరిగి కాంగ్రెసులోకి తీసుకెళ్ల గలిగారని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు శనివారం అన్నారు. కేవలం జయసుధ, నల్లమిల్లి శేషారెడ్డిలు మాత్రమే వెనక్కి వెళ్లారన్నారు. కాంగ్రెసు అనే చెరువులో ఉంటే అధికారం అనే నీరు ఉన్నంత వరకే చేపలు ఉంటాయని ఆ తర్వాత ఎండిపోతాయనే భయం ప్రజాప్రతినిధుల్లో ఉందన్నారు.

జగన్ వెంట 23 మంది ఎమ్మెల్యేలే ఉన్నప్పటికీ ప్రభుత్వాన్ని పడగొట్టగలమనే భరోసా ఇస్తే మరో నలభై మూడు మంది కన్నా ఎక్కువ పెరగవచ్చునన్నారు. అప్పుడు అవిశ్వాసం పెడితే జగన్ వర్గం ఎమ్మెల్యేలు అవిశ్వాసానికి మద్దతుగా ఓటేస్తారన్నారు. అసెంబ్లీ సమావేశాలకు పులివెందుల శాసనసభ్యురాలు వైయస్ విజయమ్మ వస్తారని, ఆమె రాటుదేలిన రాజకీయ నాయకురాలిగా ఎదుగుతారని ఆయన అభిప్రాయపడ్డారు. అలా జరగని పక్షంలో తమకు మనుగడ కష్టమేనన్నారు.

Published On November 27, 2011